#ParentLicenses1446

話說，今日喺商場排隊儲積分，期間聽到前面有兩位女士喺度嘈交

排第2女人：「喂！你睇唔到睇到前面個CS叫你過去，你無行過去，俾出面無排隊嘅人打尖啊？」

排第1女士：「個CS都無叫我，明明前面一直都係嗰兩個女士喺度儲梗分」

排2女人：「咩呀，我親眼睇住㗎，你有無搞錯呀，俾人打尖！」

排1女士：「如果係到我，個CS一定會叫我，唔會俾人打尖。如果你覺得人哋打尖，你行去問返嗰位女士同CS」

排2女人，聲浪開始提高：「點解係我去問，梗係你去問啦！」

排1女士，聲浪保持好冷靜：「人哋都無打尖，係你話人哋打尖，梗係你去問」

排2女人，聲浪比之前更大：「你有冇搞錯啊，咁都得！」

其實我都一樣有望住前面排隊，一直都係嗰兩位女士喺度儲梗分

我係後面聽住都唔知係好笑定好嬲，心諗點解會有啲咁嘅人，明明問題唔係排第一嗰位女士度，都可以咁樣無理取鬧

排1女士：「你係咪好趕時間，我讓你先」

排2女人：「好！」然後真係衝咗上前面

喺同一時候，我先發現，原來排第1嗰位女士係大緊肚，仲好似就生得咁滯

我睇到排第1女士其實隻手都震震地，但可能真係廢事同嗰位排第2嘅女人嘈，所以先讓俾佢

未幾，排1女士：「都未見過啲咁嘅人㗎」

排2女人轉身同佢講：「你大住個肚就冷靜啲啦！」

排1女士：「我冷靜啲？你無端端行過嚟話我，我讓埋俾你排我前面，我要冷靜啲？其實係咪應該係你要冷靜？」

排2女人：「件事已經完咗，你就冷靜啲！」

哇！我聽到想行前爆過個女人，明明係佢唔冷靜，無啦啦係咁爆個女士

我真心覺得大肚嗰位女士好慘，點解會遇到啲咁嘅人？都已經讓埋俾個女人排前面，個女人都仲要攞個尾彩

我真係好懷疑哩個女人係咪無仔無女生，見到人哋大肚直程好似欠咗佢咁，無啦啦爆人哋

我下刪一萬句粗口

可能你會問：點解你唔出聲幫大肚個位女士？

當時我抱住我個女，我都好驚刺激到嗰女人，一陣推到我或者整到大肚嗰位女士就唔好啦

#希望唔好再遇到啲咁嘅事
#做大肚婆EQ真係要高
#願嗰位媽媽無動到胎氣
#如果你係我
#你又會點做

讀者投稿@手抱BB媽媽上