#ParentLicenses2431

其實我都唔知關唔關生仔要考牌事，或者我係想聽下人嘅意見，又或者我只係想搵個地方發洩下

文章好長，先多謝各位嘅收看

講下背景先，我係一位女同性戀者。我唔知呢個傾向係由幾時開始，我只知我好細個就係咁。我有個女朋友，我哋打算2024年年中結婚，我媽媽當佢女咁看待，相反佢屋企人好唔待見我。我明白要老一輩嘅人去接受一般都比較難，所以我哋從舊年起已經開始去說服佢屋企

藉此向各位講述一下「同性戀」，其實我哋同所有正常人都一樣，冇任何分別，只係性傾向唔同。同性戀嘅人，一樣會有好人、壞人，有人花心，有人專一，就好似有人喜歡鑽石，但有人喜歡水晶咁，冇話喜歡鑽石就高貴啲，喜歡水晶就係一種錯。亦有好多研究指岀，性傾向可能係先天，如同胎記、樣貌、身體特徵一樣，係與生俱來，唔到我哋選擇，唔通我哋會指責一個面上有胎記嘅人唔應該出世嚟到呢一個世界嗎？

講返未婚妻嘅家人。一路以嚟，我見到佢哋都會顯得恭恭敬敬，逢新年中秋，所需要嘅禮物我都會準備妥當。甚至當未婚妻身在外地，佢媽咪唔舒服，我都會燉埋湯，煲埋粥，送過去佢屋企，事後我哋都會買一大堆保健食品送返去。佢妹生日，我重會俾封大利是佢妹。過年返去佢屋企，佢媽同家姐要湊小朋友，食唔到飯，我啦啦聲食晒自己碗飯，過去餵小朋友食嘢，等佢兩個可以安安樂樂食晚飯！對住我未婚妻，我克盡老婆嘅本份，早午晚三餐、家務、日用品、照顧佢等等，我都包攬晒

故事發生喺今年元旦，我哋喺半年前左右已經有問未婚妻嘅妹妹出唔出席我哋婚禮，佢妹妹：「使唔使要我幫手㗎？要我幫手，我就唔嚟喇，如果唔使幫手，咁我就去食個晚餐啦！」

OMG！我當時睇到o咗咀，但係okay嘅，本來就唔係望佢會幫手，因為我太太都好清楚佢嘅性格，絕對係懶得就懶，都係諗住坐埋一齊食下嘢啫

所以，我哋元旦嗰日都再確認佢一次，但佢失驚無神又話唔去，只係話祝福我哋，於是我發咗一篇嘢過去佢度，內容大概係：多謝佢嘅祝福，不過我希望佢可以親自到場祝福佢家姐，並且講述我未婚妻其實都好在乎家人。同時希望佢明白我哋嘅性取向，同佢身上嘅濕疹一樣，都由不得我哋選擇。希望佢能夠將心比己，諗下如果家人都因為佢濕疹而離棄佢，佢嘅感受會係點，藉此希望佢重新考慮呢件事

殊不知，佢大家姐就發咗段長文嚟，內容大概係：佢都唔會嚟我哋個婚禮，不過又係真心祝福我哋嗰堆嘢。跟住話佢作為大家姐要做一次醜人，將大家都唔敢講嘅說話講出嚟！首先，就叫我哋體諒佢哋全家都思想守舊，所以就唔去我哋嘅婚禮。再者，就係話佢老公個家姐都唔鍾意佢㗎，所以對佢做咗好多唔友善嘅行為。就係因為咁，所以佢對住我就好友善，亦都希望我唔好講啲令佢屋企人難堪嘅說話

隨後就同我未婚妻講唔係想大家斷絕來往，佢話佢自己作為兩個小朋友嘅媽媽，好感受到佢母親嘅傷心，重話覺得佢哋屋企人同我未婚妻越嚟越疏離，希望佢可以好好修補關係，得閒多啲返嚟食飯。又話自己真係唔係想嘈交㗎，好珍惜大家可以做屋企人嘅緣份，又話好尊重我哋嘅選擇，話我未婚妻永遠係佢嘅家人

睇到呢度，係咪大家都覺得佢大家姐好好人？好似好識得尊重我哋，或者對我哋好好咁，但係事實完全唔係咁！我見過佢家姐幾次，佢家姐真係連正眼都冇望過我一眼。我嘗試打開多啲話題，俾佢哋屋企人或者俾佢家姐都認識我多啲，知道我其實都唔係咩壞人，純粹只係想同一個自己喜歡嘅人一齊，就係咁簡單而已

但係佢家姐基本上係我關心一句，佢就只係會答幾個字。我幫佢餵個仔食飯，或者我送啲護膚品俾佢家姐，甚至佢個仔生日，我同我未婚妻送咗條金手鏈仔俾佢個仔，佢家姐真係可以一句唔該或者多謝都唔會講。點解呢種人係會講得出「對我好友善」呢幾個字？而且又講得出「自己身為人母點點點」。作為人哋媽媽連禮貌都學唔好，係咪真係有牌教自己嘅小朋友點樣做人？

再者，佢家姐連對住自己個妹都唔友善。佢兩個仔唔舒服，我未婚妻真係百般問候、百般關心，但係過去呢一年我未婚妻入咗好多次醫院，幾乎每個月入一次，我哋每一次都有post ig，佢家姐阿媽細妹都睇到，但完全係連半隻字嘅問候都冇！就算我未婚妻生日，連「生日快樂」四個字都得唔到，唔通咁都算係友善嗎？

再講，我發過去俾佢個妹嗰幾句說話，就係一啲好平鋪直敘嘅陳述，點解佢個妹無端端會覺得好難堪？正常人睇到呢段說話，無啦啦唔會覺得難堪，除非被我講中。佢自己覺得，如果當時人係自己，自己都會好難受，而佢自己就真係做咗出嚟，咁咪會覺得難堪囉

另外，為何要叫我未婚妻要盡量同屋企修補關係？明明喺過去一段長時間入面， 我不停同未婚妻講要關心屋企人多啲，勇敢去同屋企人講句「我愛你」， 而我未婚妻喺反省自己之後，都有真係去做，同媽咪講我愛你，甚至乎去關心阿妹，關心家姐，關心家姐嘅小朋友，但係換嚟嘅係極度敷衍嘅字句，甚至乎只係得一個表情符號咁大把！

我未婚妻返到屋企食飯同俾家用，佢哋都係粒聲唔岀，半句問候都冇！我完全唔明白呢個所謂家姐，叫我未婚妻同屋企人修補關係，係咩意思？係咪覺得咁樣修補都嫌唔夠？呢一年幾以嚟，我哋大家一路喺度做一啲吃力不討好嘅事，幾乎每一個行為都喺度乞討緊佢媽咪、佢個妹，同埋佢家姐嘅歡心，但係佢家姐仍然都覺得我哋咁樣唔係修補緊關係？但試問邊一個想不停喺度討好另外一個人？

（少少補充：我未婚妻係一個唔善於表達自己嘅人，好少同屋企人表達關心，但係我係一個完全相反嘅人，我真係會喺親戚面前，攬住我媽咪，同佢講我好掛住佢，好愛佢，真係時不時就發一個訊息去關心自己媽咪，同佢講我好愛佢）

容許我再重申一次，其實我哋真係冇做錯任何事，我哋冇對任何人唔住，我哋冇偷冇搶，做住正當嘅職業，甚至我哋比好多人善良得多，例如每個月都會攞一筆錢救助流浪動物，屋企領養咗幾隻浪浪！我哋只係忠於自己嘅感情，唔想做一個自欺欺人嘅人，想勇敢面對與生俱來嘅自己。點解我哋就應該要去做主動修補關係嘅嗰一個？點解我哋要做咁多吃力而不討好嘅事？我哋做錯乜嘢事，要乞求人哋嘅體諒。做咁多討好人哋嘅事，都仍然要睇人哋嘅面色？咁都唔叫修補關係，咁點先至算係呢？

呢個所謂嘅家姐，可以做家姐做到咁，把口就講到大家唔敢講，所以佢嚟做醜人。我唔明白做家姐點解可以只係做醜人，你唔可以做一個好人？我自己都係人哋嘅家姐，我做家姐至少係稱職，就算我唔喜歡我自己個妹嘅男朋友，覺得佢男朋友唔承擔責任，但係我仍然都會俾好多機會，嘗試將個妹同屋企人嘅關係拉近，亦都俾咗好多機會我個妹嘅男朋友嚟我哋屋企，等屋企人可以認識佢男朋友多啲。同樣身為人哋嘅家姐，佢半句好說話都冇向佢媽咪講過，咩都冇做過，佢唔覺得好需要檢討自己嘅咩？仲夠膽話自己係做人哋媽咪，唔通佢都想教自己個仔要好似自己咁，冇禮貌咁對待其他人？唔去扶持自己嘅兄弟？唔通佢都想教自己兩個仔，第時大個咗唔需要咁關心自己阿哥細佬？就算阿哥細佬關心自己，都要當聽唔到或者睇唔到，是但敷衍咗對方就算數？對方需要關心或者慰問，或者需要幫助，唔舒服或者病嘅時候，最好都係合埋對眼，合埋對耳，當睇唔到？乜咁樣都可以做媽咪嘅咩？

我未婚妻嘅妹妹，亦都係令我非常無語。既然覺得接受唔到，咁點解當初接受我哋禮物嘅時候又接受到？既然覺得我哋同性戀有問題，點解我當初俾咁大封利是嘅時候，佢又唔拒絕？係咪有著數嘅時候，就接受到我哋係同性戀？冇著數嘅時候，就一句口頭祝福算數？佢哋爸爸媽媽到底係點教育佢哋？

其實我覺得真正嘅尊重係會發自內心，唔係只係得口頭講幾句說話。相信真正尊重我哋嘅選擇，唔會每次我哋出現，甚至只有我未婚妻一個人出現，都將我或未婚妻當成係透明人。每一次我同未婚妻同佢哋講嘢嘅時候，佢哋都有意無意唔回應我哋。喺我未婚妻最需要家人關心同慰問嘅時候，佢哋完全冇出現過，只係喺度冷眼旁觀

我絕對明白有啲人對於有啲事係接受唔到，但嗰個係你嘅親人，至少都花少少時間去了解一下親人嘅選擇或者佢嘅感受，先至決定你係咪真係接受唔到，而唔係好似佢家姐咁，一口就斷言自己思想守舊。事實上，我又真係唔認為佢家姐係思想守舊嘅人，真係思想守舊嘅人，會未結婚就同人同居咩？真係思想守舊嘅人，會一日到黑，都將唔想生仔，想生女掛喺口邊咩？思想守舊嘅人，會咁唔顧念親情同埋手足之情咩？我感覺上係佢家姐懶得去了解，而家到底發生緊咩事？最緊要唔好煩到佢，係咁大把！

然而，其實令我最最無奈嘅唔係佢家姐，都唔係佢個妹，而係佢媽媽！無論我未婚妻整親、唔舒服定係入醫院，佢媽媽真係半句說話都唔會問！但係佢家姐只要有少少要求，甚至話要大幅裝修屋企，只係一句而已，佢媽咪都會衝過去滿足晒佢家姐，偏心真係偏到出晒面！

呢種母愛，我真係理解唔到，亦都唔想理解。我只可以話做人哋媽媽，如果你唔能夠俾足夠而平均嘅愛，只可以俾你是但一個仔女，咁唔該你唔好生咁多！

佢家姐係咪真係咁錫佢我唔知，我自己就唔覺得係，就算我為咗捍衛自己未婚妻而講嘅錄音，佢家姐都冇聽晒。呢種人只係想知自己表達啲咩，完全唔想知自己親細妹嘅心入面係點諗！呢種人真係可以做人哋媽咪咩？佢真係識得教自己嘅小朋友點樣做到和睦共處咩？

讀者投稿@長篇大論的女人