#ParentLicenses2430

今日帶仔仔去商場入面嘅公園玩，入到去佢第一時間衝去玩滑梯，仔仔上到去發現有個著幼稚園校服嘅姐姐迎面由滑梯底行緊上嚟

我仔就同我講話踩污糟咗，於是我問我仔：「咁你想唔想去玩第二條滑梯，唔想嘅反正嚟公園玩都係眼不見為淨？」

我仔仔答話：「No，媽媽抹返，thank you」

我呆咗呆，於是就好無奈地拎咗包濕紙巾出嚟抹條滑梯，抹完佢就肯玩重玩得好開心。嗰位妹妹全程喺後面望住，佢突然間講：「我對鞋唔污糟㗎」

我哋雖然冇理佢，但我覺得佢有啲搞笑😂

過咗一陣，嗰位妹妹玩完一輪其他嘢後又返返嚟我仔玩開個條滑梯。我仔瀡完一輪又上返去玩軚盤，擰轉頭見有人玩緊望遠鏡，佢又走去隔離企喺度睇下有咩睇。個妹妹叫我仔走開，跟住出手撥開佢。我仔呆咗呆望住佢，我無出聲企喺度望住個妹妹，因為佢媽媽就企喺我隔離

個妹妹知我望住佢就同我講：「佢唔肯走開呀！」

當刻我唔嬲，反而覺得有啲無奈，見佢媽又零反應，於是就自問都幾溫柔地同個妹妹講：「呢度係公眾地方嚟，大家都可以一齊玩一齊睇風景，如果你真係唔想有人喺身邊你可以講，雖然我仔仔得兩歲，但佢都聽得明『借借』呢兩個字，記住以後唔好出手喇，知唔知道？」

妹妹無應我，我望一望佢媽都無反應，佢媽只係望一望我就繼續低頭撳手機。我唯有叫我仔仔不如去玩第二樣啦，我仔又繼續好開心話好走嚟瀡滑梯話去玩鞦韆。喺我仔瀡到落底之際，個妹妹大聲得嚟又有啲溫柔咁同我講：「我係壞人嚟㗎姨姨」。過咗一陣後，我就聽見佢媽同佢講咗句：「玩夠未呀？返去做功課喇」（七點都嚟唔係食飯先？）

其實我真心覺得，小朋友出公園玩有少少爭執好正常，玩公園都一定係眼不見為淨，真係驚咪好似我仔咁叫我抹，細嘅咪教佢哋見到大嘅要避開囉，因為佢哋都重細唔識遷就

我知幫人教小朋友好傻，但我都知大部分小朋友本性都唔壞。而家諗返起啱啱件事，我覺得有啲搞笑又覺得個妹妹有啲可憐，因為我聽佢講呢幾句說話直覺佢都唔係太曳，只係拉唔落面子同冇得到正確教導而已。加上，喺呢個page睇睇埋埋啲post，真係好想講每個家長有自己嘅教法要互相尊重，但最緊要肯教

小朋友都係白紙，係寶玉，如何雕琢在於父母，如果佢哋做得唔啱係要及時糾正，唔應該視而不見。但如果你小朋友俾人恰，都唔好第一時間衝去鬧人，過份保護亦唔係好事。每一個未懂性嘅小朋友都值得溫柔對待，即使係行為惡劣也好，都有被溫柔感化嘅可能，可況咁細嘅小朋友或者未得到正確教導嘅小朋友？

我事後都有教返仔仔，如果出嚟玩有人推你，你就同佢講返推人唔啱㗎，但你唔好出手推返佢。講完如果佢唔理你（雖然應該都唔理㗎喇），你就自己行去玩第二樣嘢或者同媽媽講啦。記得去公園係一齊玩，你想玩都係用口問，唔可以郁手㗎。始終我仔得兩歲鬆少少，我唔知佢明幾多，但我相信有教總比唔教好

讀者投稿@無奈嘅媽媽