#ParentLicenses2401

昨日喺中環碼頭有氫氣球派，小朋友A拎咗兩個，小朋友B拎咗一個，分別綁咗喺各自嘅BB車度，然後搭船就入咗長洲。小朋友A有兩個係因為喺個碼頭度等咗一段時間，派波嘅人同佢傾偈而俾多一個波佢

去到長洲沙灘，為咗避免小朋友撥到啲沙入BB車，就將架車放喺近上落位嘅空曠地方，而兩個家庭就喺前少少嘅地方玩。走嘅時候，始發現小朋友A嗰兩個波無咗，佢好唔開心啊😭😭😭

補充吓個綁法先，小朋友A個波嘅綁法係兩個綁埋一齊，然後不斷繞過個手柄，再打個平結，照道理係好難吹得走嘅，而且去沙灘前都閒逛咗個幾鐘，一直都相安無事嘅。小朋友B個波嘅綁法係喺較高位置近波嘅位打個平結，而條繩嘅下方係繞咗幾個圈再打個平結（之前套過落小朋友隻手度）。最後小朋友B個波條繩變咗死結，下面個結都散咗

喺離開沙灘去碼頭條路時，見到有一家三口拎住咗兩個波！點解嘅？又會咁啱嘅？我哋大膽哋推測小朋友A嘅兩個波係被人偷咗。嗱！戴返個頭盔先，唔一定喺呢一家三口偷嘅，但一定係有小朋友嘅人做㗎啦，正常成年人都唔會偷人呢啲波啩？

我哋無看住都有疏忽嘅，但點估到你連波都偷啫🤷🏻‍♀️。為人父母都想小朋友開心，咁你帶住個小朋友拎人哋啲嘢，咁樣好咩？你小朋友開心，人哋小朋友就好傷心，一路傷心到返屋企啊陰公😭😭😭

做父母要以身作則，尤其喺小朋友面前更加要做好榜樣啦！當你小朋友好想要個波，當你唔知我哋喺前面，唔知道個波係我哋嘅，問唔到人可唔可以俾你，你都拎一個就算，放返低另一個俾小朋友吖，佢真係好唔開心☹️☹️☹️

希望你以後會做返個好榜樣，唔好再做低劣行為，唔好教咗個賊仔賊女出嚟，小時偷波大時偷金！

讀者投稿@以身作則