#ParentLicenses2392

我老公同前妻有個九歲嘅仔。個仔原本跟前妻，喺個仔準備升小學嗰陣，前妻叫我老公要返個撫養權，話自己搞唔掂之後，小朋友就返咗嚟跟我哋。其實老公一直都想要個仔嘅撫養權，奈何嗰陣個官判咗俾前妻，所以當老公有咁嘅機會當然就答應了

個仔返咗嚟我哋度之後，前妻就搬咗嚟同區話方便見個仔。每逢星期五晚或星期六早上，個仔就會返前妻度，至星期日晚飯完就返嚟

星期日係我同老公嘅Family day，因為大家得呢一日唔使返工，多數都會出街。然而，好多次喺下午十二點至一點左右就會收到個仔電話，仔話佢媽轉頭要去街所以叫佢返嚟先，就問屋企有冇人

我哋出咗去，屋企無人，又點可以俾個仔一個留喺屋企呢，但個仔都會話佢媽一定要出街，堅持要佢返咗嚟先，所以無奈好幾次喺街都要立即仆返屋企。雖然明白小朋友係無辜，但都覺得前妻呢啲行為好自私好影響，一早講咗幾點，話改就改，全世界就佢一個

最近再發生咗一件事，真係完全令價值觀崩潰

有一日，我收到奶奶whatsapp通知個仔病咗，我一直以為佢張身份證係由奶奶保管（雖然我哋一齊住，因為平時我哋返工，多數牙科保健嗰啲係嫲嫲去，所以放喺嫲嫲度），之後我諗住襯lunch time有空檔就帶個仔睇醫生，就問奶奶佢張身份證喺邊，諗住去登記咗先

點知奶奶就話張身份證喺佢呀媽度，我隨即叫奶奶打俾佢媽叫佢媽拎身份證去登記先（佢媽住我公司同診所樓上）。因為登記完都要等至少兩個鐘先有醫生睇，咁佢媽登記完我就可以帶佢去睇。不過打極俾佢媽都無人聽，直到有人聽嗰陣，發現原來佢唔喺屋企。我就惟有問佢幾點返，對方答今日全日都唔會返，聽日應該返

我🙄🙄🙄，已經話無身份證、passport、出世紙，我同唔到個仔登記睇醫生，個仔好唔舒服，但得到嘅回覆就係「今日都唔會返，聽日先返」，再追問聽日幾點返，都係只得到「應該」嘅答案。最後佢叫我拎張証件相就可以去登記

之後個星期五，個仔返咗去，我就叫個仔拎返啲証件返嚟，以防不時之需，始終佢長時間喺我哋度，我哋有嫲嫲、爸爸、工人，有咩突發事情發生起上嚟，都一定有人拎到証件先，而且我老公都有同個仔講：「診所就話可以拎下手冊，証件相登記啫，如果要去政府部門政府醫院嗰啲點都係要用返身份證」

直到星期日，個仔返到嚟仍然係無拎証件返嚟。個仔話佢媽咪唔肯俾佢，叫佢返嚟同我哋講有乜就拎張相，無論係唔係政府都好，都一定登記到！

我真係反白眼反到去後腦，其實我真係唔係好明，人又唔要，死都要留住張身份證做乜呢？個仔又未夠十八歲，怕我哋拎佢張身份證借錢？個仔病，經過一日一夜都唔肯返嚟拎張身份證俾佢去登記睇醫生，重要佢等第二日。已經發生咗一次咁嘅事，都仍然要死攞住佢張身份證。個小朋友一星期有五日喺我哋度，學校嗰啲嘢全部我哋搞，一星期喺佢度日半至兩日，如果講到有張相就乜都得，真係唔明點解佢唔keep相要keep身份證囉

唔明點解有呀媽可以咁唔緊張個仔，重要鬥氣死都要keep住張身份證

讀者投稿@一言難盡