#ParentLicenses1105

唔知道大家有冇聽過妥瑞症呢個症狀？

我個仔今年八歲，喺六歲嘅時候確診咗呢個症狀。佢嘅狀況唔算太嚴重，起碼唔會影響到身邊嘅人。佢會眨眼、搖頭同埋做鬼臉

上個月帶佢去銅鑼灣覆診，由於聖誕裝飾都未拆，好靚又吸引，所以停咗腳步，同仔仔欣賞

睇咗陣，有個同仔仔差唔多大嘅小朋友都近賞聖誕裝飾

喺正隔離，真係喺正隔離！！！！！！係另一個小朋友同佢媽咪嘅對話……

小朋友：「媽咪，點解佢係咁搖頭嘅？」

媽咪：「佢可能傻㗎，唔好企咁近，費事佢突然打人」

小朋友：「媽咪，你睇下，佢塊面好似抽筋咁呀」

媽咪：「好心傻嘅就唔好帶出街啦，影響到人點算」

我忍唔住，聽到真係好嬲

我：「太太，我仔有妥瑞症，佢行為上的確同其他小朋友唔同，但你哋有你哋睇，我哋有我哋睇，究竟影響到你乜嘢？」

媽咪：「嘩！會唔會傳染㗎？你咁黑心嘅，我個仔企喺你個傻仔隔離咁耐，又傻咗咁點算，真係自私」

我：「你無知又無品，我仔唔止唔係傻，反而比一般小朋友更聰明。醫生講，學校成績亦一直都頭幾名。我個仔係大腦內嘅多巴胺受體過度活化，所以會咁，你唔知，我宜家話你知！！！」

「當住我哋面前又話傻又話傳染，會令我仔好難受。為人父母，身教同口德好重要，做返個有人品嘅媽咪啦！」

媽咪：「讀特殊學校呀，死傻仔，癲嘅生個傻，啱啱好！」

之後兩母子即刻走咗

走咗之後，我個仔忍吾住喊。我真係好心痛。太太，唔知你睇唔睇到，你隨口幾句說話，可以令人好崩潰！

妥瑞症係唔會傳染，希望大家多啲了解。唔明或者唔了解無所謂，至起碼見到呢類小朋友，唔好再傷害佢哋嘅心。本身佢哋已經好辛苦，但願唔好再有人用難聽嘅說話去傷害佢哋嘅心，真係好難受！

讀者投稿@傷心嘅媽咪