#ParentLicenses1042

Sorry文長，好大怨氣，求超度，謝謝！

我係細佬，因為家姐嘅戇鳩，我無啦啦由一條毒L，練成咗餵奶掃風抆屎育兒一身好武功

家姐三字頭，結咗婚三四年。起初都有自知之明，亦唔鐘意小朋友，所以唔生。佢同姐夫鐘意食好嘢、買名牌，ig永遠 #品味生活

後來佢個福建幫老爺一句「恨抱孫」、「生仔有錢派」，仲課埋金俾佢哋去泰國人工受孕。玩咗幾轉，終於一索得男

本來唔關我事，而係由佢華麗產子後，我嘅惡夢就開始

好似我家姐呢啲咁高貴嘅港女，叫佢去政府醫院生仔真係慘過食屎，所以最後佢揀咗去養X開刀，因為近佢老爺屋企喎

住咗五日四夜，佢老爺只係過嚟探咗佢……個B一次，而我呀爸呀媽就日日長途跋涉咁「出城」送湯送飯照顧佢

係呀，係「出城」呀。因為兩老好少出港島，唔識路，又緊張，最後我要突登請假車佢哋出去照顧呀大小姐

「大佬，我係細佬，無侍產假的」

家姐出咗院話要返娘家坐月，佢重金禮聘個金牌陪月過嚟，但就係齋講唔做嘢嗰啲，佢加埋家姐，日日當呀媽工人咁使

佢老爺嗰邊啲親朋戚友，仲有佢兩公婆啲豬朋狗友，久不久又話上嚟探B。我哋住公屋，但就日日迪士尼輪迴表演逼爆人。因為疫情，我同呀爸晚晚洗嘢抹嘢消毒，做到隻狗咁

家姐坐月大L晒，朝朝喺房瞓到十點，然後食補品、敷面膜、幫個仔拍片po ig；BB床就放喺呀爸呀媽房，隻B平均三個鐘頭喊一次扭飲奶。呀爸第二朝要返工，深宵餵奶換屎片嘅重任理所當然地落喺我媽身上

我一向醒瞓，加上嗰期我一星期有三日wfh。我唔忍心見呀媽六十歲人捱更抵夜，有時我都會主動起身幫手餵奶換片，點知咁就中伏

可憐家姐生仔生走埋個腦，佢覺得我wfh就等如死廢青好得閒，加上佢個人又無耐性，次次餵親奶佢仔都喊到拆天，永遠抱唔夠一分鐘就老奉「隊」隻B過嚟叫我「接力」

「喂呀姐！請問你出咗咩力俾我接呢？」

如是者，過咗一個月奴隸生活，佢終於坐完月連人帶B加埋個金牌陪月彈返自己屋企

但點知玩唔夠一個禮拜，佢又彈返入嚟……

佢話同個陪月嗌交，仲炒埋人。開刀個傷口又發炎，姐夫OT夜返唔幫手，自己湊仔湊到產後抑鬱，仲要準備下個月返公司啲嘢……

最後丟低個仔，頭也不回，轉身就閃咗

「都好吖，當湊少個大」

完全想像唔到隻B喺佢老母屋企經歷咗乜，因為無見一個星期，成個背脊同patpat冇忽好肉。問返智將家姐，佢之後先話：「可能陪月用莞茜水幫BB沖涼啩」

「…….」

最後呀媽帶咗佢仔去睇兒科，仲要瘋狂俾個醫生鬧佢無知：「老人家信埋啲偏方，搞到個孫細菌感染皮膚炎，要搽類固醇」

「……唉，我媽全程硬食」

有一日，呀媽湊B湊到頂唔蒲喺屋企暈低咗，好彩嗰日我wfh見到，即刻call白車送媽咪入醫院

嗰日我打俾家姐諗住叫佢請一日假，想佢過去隔離屋識咗幾廿年個街坊度湊返自己個仔。點知佢第一句唔係問呀媽有冇事，而係喪小我點做人舅父，亂咁將佢仔交俾外人，BB有咩事我就係兇手

「……OK，你直接搵黑警拉鳩我吧」

咁佢係慈母同孝順女嚟㗎嘛，最後佢就請咗個菲律賓姐姐放喺我哋屋企幫手。兩老唔識英文，管理姐姐重任當然落喺我呢個細佬身上啦。工人姐姐嘅問題我呢度就唔多講喇，總之我真係多鳩謝你呀家姐！

我唔知佢老爺俾咗幾多獎金佢哋生仔，只見佢同姐夫每星期唯一一次上嚟探仔時都身光頸靚，新車新錶新包包，炫富界KOL咁

不過幾多錢都好啦，都唔會買到個仔對佢哋嘅愛，尤其對住兩個由排卵、授精、生產、照顧到教育，都係俾錢外判出去嘅父母

BB家吓九個月大識認人，黐我但唔黐父母。有次家姐監粗抱佢玩selfie，呀B發脾四爆屎還擊。家姐即刻胡定欣上身，一副港女嫌棄咀臉，九秒九掉走個仔由得佢爆喊

我每次都會兜口兜面話鳩佢：「點做人老母！」而佢每次都會串返我：「好心你做人舅父咪咁小器啦！」

老老實實，我對家姐生仔考牌係零期望

我只有三大訴求：

一）佢下次上嚟玩B時，唔好gel閃石指甲同黐假眼睫毛，因為佢身上啲假體跌到我周屋係，個B係會執嚟食的

二）唔好又再失驚無神揸架名車嚟接走個B同姐姐去呀老爺度，然後玩到凌晨兩點再車返佢哋返嚟。因為你返到屋企係可以即刻瞓覺，而我同呀媽對住你個仔係有排搞㗎

三）個B大個唔好似老豆老母

無意冒犯，但身體很誠實，我家陣見到啲閃閃gel甲、假眼睫毛、孭channel袋嘅女人，尤其老母，我會即扯火

讀者投稿@細佬我方丈