#ParentLicenses0941

喺仔仔8個月大的時候，知道自己有咗兩個月，雖然都有諗過生兩胎，但無諗過咁快。然而，身邊嘅朋友都叫我生，但你哋知道我有苦衷嗎？我最後選擇落咗，無要到

仔仔係屬於人工受孕，有計劃下生嘅，一切都為佢預備好。由於我哋兩公婆無四大長老可以幫手，所以要一切預備好先有呢個小朋友。雖然我份工薪金好好，但都已經諗好會辭工，做一位全職媽媽

可能有人會問：「點解唔請工人？」

我始終過唔到自己個關，唔想將湊小朋友嘅責任假手於人，加上外傭質素參差，平日亦無長老睇住佢做嘢，所以最後決定辭職了

生咗仔仔後，由我哋兩公婆照顧。老公放工放假都留家幫手，平日就我照顧。講真，唔做過唔知，所以平時一有人同我講：

「你個仔大得好快喎」
「小朋友好快大，好快易湊」
「日子湊下湊下就過」

聽到以上等等說話後，我都會話：「度日如年呀！」

因為講呢堆說話嘅人都係有工人，有長老，或者跟本就唔係自己湊嘅人。我真係好想講：「淨係食瞓痾都已經可以有排做，唔計其他家務及日常生活嘅嘢」

當習慣咗8個月後，估唔到我竟然自然懷孕咗，仲要有咗兩個月，簡直晴天霹靂。其實4, 5年都自然懷孕唔到，我先去人工受孕，今次係咪個天要玩我……？

喺決定要唔要嘅哩兩星期，我搵人傾，亦放棄執著，嘗試去搵工人幫手。點知喺疫情期間，工人更加參差，見咗4個都話：「有兩個小朋友，唔做」

原來即使提高薪酬，疫情下揀工嘅工人很多，所以最終我都放棄了，事後我亦慶幸無請，因為喺新政策之下，更多不合理情況出現

請褓母或請鐘點，但唔係24小時嘅，可以幫到幾多？全職媽媽就會明白

亦有朋友叫我：「生咗先算」

但真係可以咩？經歷了生與唔生嘅問題下，我決定唔要

可能會有好多人鬧我：「點解咁做？」

仲會鬧我：「會有報應」

但我想講：「我墮胎係傷害我自己，但生佢可能係傷害佢」

一：大仔難湊到救命，如果細嘅出世，佢哋只係差14個月。真係大嘅湊唔掂時，細嘅又點搞，咁對大嘅好唔公平

二：大仔進度比同齡慢兩個月到，8個月嘅佢都未坐到，同埋呢啲嘢無得急，唔係想佢做到就做到（最後佢14個月先開始扶行穩陣）。如果呢個時候細嘅出世，我真係唔知點搞好

係，只有怪我唔小心，做咩咁肯定自己一定自然懷孕唔到，咁嘅後果要自己負責返。我實在唔想個BB出世後，要大嘅細嘅一齊負責，因為唔關佢哋事

最後，我係覺得好可惜生唔到呢個BB，但我希望BB感受到我唔係唔愛佢，係我好想對你負責任先咁做

讀者投稿@兩難媽媽