#ParentLicenses2342

每逢公眾假期、運動會、聖誕聯歡會等等嘅日子前後，唔少中小學會出現請假潮，當中都不乏係請假去旅行。呢啲家長通常唔聲唔聲就買晒機票，問佢做乜請假，不外乎搬出以下理由

「早兩日走/遲兩日返嚟，機票會平幾舊」
我欣賞你咁誠實，但有冇諗過你個小朋友其實都錯過了唔少同同學相處嘅學習機會，成日咁請假都影響小朋友同人嘅關係？

「要返鄉下探親」
返鄉下其實唔差在一日半日，係咪逢親假期前都係咁？最搞笑有時收到嘅請假證明係韓國或者日本機票，你確定你鄉下真係韓國或日本？

「有親人就走，要去見最後一面」
點解有啲學生嘅親人成日喺長假期前夕先話就嚟走？

「家有要事，唔方便講」
其實仔女踢爆你哋所謂嘅「要事」就係買咗平機票去旅行。賺咗平機票慳返嘅錢，在仔女面前輸咗人格，真係冇問題？

其實老師都唔會為咗平機票而掉低學生唔返工

如果你哋啲家長睇得學校嘅教育咁冇價值，不如唔好返。有冇諗過非正式上堂嘅日子，雖然老師不是正規地教書，但其實有時你啲仔女正正最需要呢啲時光？例如運動會同人分享下嘢食、嗌下啦啦隊口號、聖誕聯歡會睇下人表演、交換下禮物、搶下嘢食、小息同人嗌下交等等，呢啲全都可以係學習嘅一部分

而家啲細路仔郁啲就𠝹手跳樓，好多時就係缺乏咗同人相處嘅經歷，往往一遇上挫折時就冇咗解難能力，亦都缺乏咗跟其他人長期建立嘅愉快情感去對抗突如其來嘅負面情感

今次投稿，唔係否定家長同仔女去旅行嘅價值，而係想一眾家長反思下每逢假期前後，究竟係平機票值啲，定係讓仔女學習跟不同嘅人有學術以外嘅經歷值啲

讀者投稿@你老c