#ParentLicenses2326

從前有個小朋友叫小明，佢細細個就成身痛，但佢父母從來都唔會選擇相信

佢父母成日同啲親戚講：「佢詐病，唔想上運動堂之嘛」

有時小明會被親戚當面嘲笑，久而久之，小明唔敢再同父母講自己痛。小明只會在覆診日子，逼不得已先要父母簽家長信請假，當然都會被父母踩幾腳「咁渣」、「無用」之類說話奚落

小明就算痛到癲，佢都會死忍爛忍，忍到放學先去急症室打止痛針，原因只有一個——請病假會驚動父母。痛都係小事，俾父母話詐病真係比痛更難受

後來小明長大咗，有一日口快快講咗自己重有痛，父母聽到之後好驚訝，小明以為父母終於相信自己

日子一日一日咁過，小明依舊好少向父母透露自己身體狀況，有咩事都習慣咗自行處理妥當

成年小明因為某些身體狀況，唔係好食得落嘢。為此，父母經常訓斥小明「你真係唔正常」「要食點會食唔到」「食啦，你睇下你想點呀」云云

由於小明從小就好怕同父母講身體狀況，所以搵弟弟向父母解釋清楚狀況。可惜事與願違，父母打擊依舊

為咗改善胃口，小明好努力用盡方法去改善胃口，終於胃口慢慢有進步。有日一家人一齊出街食飯，弟弟見小明食到半碟飯，就好開心咁讚小明，而小明自己都好開心

然而，冷不防爸爸一句說話：「做咩要讚佢呀？！讚佢等於縱容佢，食到咁重要讚佢？」

小明由開心天堂跌落地獄，雖然小明從小就同自己講「唔好渴望父母讚賞，因為呢件事係無可能發生」，但嗰刻小明先發現自己心底其實係好渴望得到讚賞

小明發現喺屋企食飯好大壓力，令自己嘅胃口更差，所以寧願多啲出街

不過大家唔好以為小明父母好衰，其實佢哋係好錫小明，只不過佢哋用咗超錯嘅方式，名符其實「因愛之名，互相傷害」

可能父母成長路上都係遭遇上一代超錯教養方式導致，但希望呢種錯誤可以喺呢一代停止

呢個故事想話俾大家知，請你信任及讚賞你所愛的人，把口好啲，世界更美妙

呢個係真人真事，不過由於唔想令小明父母傷心，所以化名成小明講呢個故事。希望大家反思下同屋企人相處方式，除咗要有愛外，還要懂得正確表達，如果唔係，就等如長期桶刀

讀者投稿@小明