#ParentLicenses2319

今日喺將軍澳翩滙坊同小朋友玩完波波池就去咗排隊玩車車，呢個設施容納每轉四個小朋友，每次五分鐘玩耍時間

大家一直都好守規矩咁排隊，前面第一轉小朋友上咗車，職員姐姐就安排第二轉嘅小朋友入去坐低等。我計過排隊人數，我哋係第二轉嘅第三第四個小朋友，小朋友非常興奮

正當小朋友準備行入去，有位着橙色衫嘅媽媽衝過嚟話：「等埋等埋，我哋一齊嘅，俾我小朋友入埋」

職員姐姐無留意到嗰位媽媽並無排隊就俾佢入咗，結果就因為得返一個位，我又唔想分開兩個小朋友，所以我哋就被迫等吓一轉，即係又要等多五分鐘

我好嬲，覺得對兩個小朋友好唔公平，明明佢哋好乖咁排隊，因為俾人打尖而又要再等多五分鐘，遂即刻就叫咗嗰個職員姐姐過嚟同佢講個情況。嗰幾位媽媽聽到我同個職員嘅對話就行過嚟聽，但佢哋扮無嘢

過咗一陣嗰幾位「好有家教的媽媽」嘅小朋友玩完出嚟，其中一個媽媽居然用一個好凶狠嘅眼神睥住我

我就問佢：「你睥咩？」

佢無正面回答我，只係同佢其他媽媽朋友講：「小朋友嚟玩啫，唔使咁下話」

然後嗰幾位有家教的媽媽就睥住我咁走

我真係想問吓你呢幾位媽媽，你哋打完我小朋友尖，俾埋你哋玩咗先，我哋繼續等，咁樣都重要道德綁架我？排隊嗰度頭頂就有幾個CCTV，我大可以要求職員叫返你兩個小朋友出嚟，但我冇咁做，只係同職員姐姐講返當時嘅情況，係唔希望呢件事情發生喺其他小朋友身上，希望佢哋留意吓！

你哋咁嘅態度真係令我好懷疑係咪我錯？你哋打我尖我連出聲嘅資格都唔可以有？唔係一句你哋識嘅，係一齊嘅就可以唔使排隊。我今次讓你哋係人情，唔讓係道理，希望你哋可以學吓尊重人，真係想成班朋友一齊玩就乖乖地排隊

最後想讚吓嗰位職員姐姐，當時佢聽到我講個情況，佢即刻同我講唔好意思佢留意唔到，下次會小心。佢亦都話我聽，佢明白我只係想嗰幾位媽媽尊重我同小朋友

有人明白我個心諗乜真係有啲感動，同時都好感恩自己有兩個乖嘅小朋友一直企定定等。雖然有小插曲，但佢哋都玩得好開心

事件係真實發生，如果有去開嗰個商場玩嘅，歡迎你哋去問吓，有CCTV同職員姐姐做證

讀者投稿@不知道自己做錯什麼的媽媽🤣