#ParentLicenses2308

作為一個狗嘅主人，希望各位家長教育你哋嘅小朋友，玩狗要有禮儀，狗仔唔係玩具，唔係每一隻狗都啱你玩。尤其是小朋友係小學生年紀，因為再細啲嘅小朋友父母通常會睇得緊啲

狗嘅耳仔好靈敏，佢哋聽到突如其來嘅尖叫，會令佢覺得好刺耳、好緊張，所以請唔好喺狗狗面前尖叫。因為每隻狗嘅性格都唔同，若然突然衝過嚟就摸佢，佢係有機會因嚇親而攻擊你，所以請你必須喺想摸狗之前先問准狗主人。

摸狗都有正確方法㗎，如果狗主人答你可以摸，先俾手背狗仔聞下，等佢哋熟悉你的味道，然後你再觀察狗狗的反應，見佢冇抗拒或者避開，之後先輕力摸，而且唔好摸或者捉佢哋條尾，呢個部位係非常敏感，真係會嚇親佢哋

另外，狗狗（包括狗主人）都需要私人空間，就算好鍾意都係玩一陣好了，玩得太耐就會變成騷擾，例如我試過喺狗cafe被幾個細路搞足全程，到我頂唔順走嘅時候，先見到家長啱啱先嚟到

我曾經聽過有人說「唔摸得唔好帶出街啦」，我養狗係因為我鍾意狗，而帶佢散步係我同狗狗嘅日常生活，此當中係無義務成為你小朋友嘅玩具，亦唔係一定要俾你摸

我好多時遇到嘅係，細路有細路玩，家長坐喺老遠玩手機或者傾計。家長要知道，你自己唔睇住或者冇教好佢哋點摸狗，如果唔好彩真係被咬到的話，請你唔好追究，因為係你自己教得唔好，個責任好大部份係喺父母度！

最後想講，聽到好多個案係小朋友要求父母「買隻貓或狗俾佢玩」。請明白你有你嘅家人、朋友、社交生活，但狗狗眼中只有你。準狗主係要預備好未來十幾年，無論發生咩事，都需要一直照顧佢大小二便、食飯、散步，而且係每日必須要做，佢哋甚至亦有機會生病。如果有少少覺得自己有機會負唔到呢個責任，我希望你唔好養

再者，嚟緊你同你嘅小朋友生活上會唔會再轉變？會唔會移民？會唔會上公屋？有冇計劃過小朋友去第二度讀書？嘗試問下自己，當遇到生活上嘅改變，你係唔係會選擇放棄寵物？如果會，都懇求你唔好養

養寵物係一生一世嘅承諾，我嘅狗狗係我嘅家人，並唔係玩具，千祈唔係貪得意買返嚟，棄養係一單都嫌多

讀者投稿@狗奴