#ParentLicenses2303

我有一個讀幼稚園嘅女，同一個港女老婆，一齊同我七十歲阿媽住

由準備結婚開始，我希望搬出去二人世界，但我老婆唔想，因為佢好鍾意我阿媽間屋，佢好鍾意帶朋友返嚟，佢朋友嚟就要我阿媽消失全日。老婆有返工，賺錢買花戴；我有俾家用佢，但係佢一蚊都唔會用喺呢個屋企

自從個女出世之後更差，除咗十月懷胎同埋放產假嘅時間，之後就冇盡過做阿媽嘅責任——餵奶換片都唔肯，只會完全當個女係打卡工具，例如扮吓餵奶、扮同個女玩、扮睇書、落樓下買外賣、去會所玩等等，影完相就掉返個女返嚟，自己就約朋友去街或者全日喺房煲劇。成日都叫個女唔好嘈，唔好講嘢，連玩玩具都叫細聲啲，當嫲嫲唔喺屋企時，就會俾部iPad個女坐埋一邊慢慢睇，總之就唔好煩到佢

最近個女半夜發高燒同嘔，我叫老婆起身睇住個女先，因為嫲嫲要抹地換床單，而我就要餵藥同探熱。我老婆竟然叫個女唔好過去，唔好傳染俾佢，因為佢要睇幾日演唱會唔可以病；個女要媽媽抱，但係竟然大聲喝住唔准入房

我真係好嬲，究竟個女係唔係你親生？平時唔理佢都算數，佢唔舒服你都唔關心下佢，你緊張個演唱會多過個女？我嗰晚覺得個女好慘，我同個女講：「無論將來點都好，爸爸一定照顧你，會睇住你成長」

最終係我半夜帶個女去睇急症醫生，臨天光叫嫲嫲落樓下抱阿女上樓，我去返工，重要開會，冇得休息

我真係好攰

呢兩日老婆又嘈，因為個女英文功課連線配對錯咗，收到老師訊息通知要改正。佢一返到屋企就係咁鬧我阿媽，話個女咁蠢全因為嫲嫲教衰晒。個女眼瞓扭計又係嫲嫲寵壞，個女白鞋仔污糟咗又嘈，個女食嘢太慢，裙唔識燙，全部又係「因為嫲嫲乜乜物物」

我嗰下叫我阿媽入房先，我心平氣和同老婆講：「既然唔鍾意老人家幫手湊女，咁我哋搬出去住，你辭職全職湊女，自己教女，自己摺衫煮飯，唔好再將個女嘅責任推俾老人家」

講到底，佢唔要搬走，要走就我阿媽走。間屋係我爸留俾阿媽嘅，絕對冇可能要佢走

結婚前老婆唔係咁，個女出世之前都唔係咁，點解個女出世之後變咗第二個人？點解會變得咁不負責任、咁自私？我有時會諗「生仔真係要考牌」，如果小朋友對你嚟講咁有壓力，當初就唔好同我講想早啲生BB做媽媽。小朋友唔係工具，唔係人有我就要有

讀者投稿@好攰嘅爸爸