#ParentLicenses2283

話說事情發生喺9月7日下午兩點左右，海港城一條往上方向嘅電梯。當時我跟喺一個五人組合嘅家庭後面，隔咗約三四級左右。我習慣性唔鐘意跟太貼，除非喺地鐵站嗰種人迫人就無計

呢個家庭將全條電梯塞爆左右，我覺得都唔係問題，反正我唔係想超前，同埋唔係咁多國家有左行右企嘅概念。我再留意一下，發現呢家人當中重有一架手推BB車

直至電梯攀升到最頂，到咗出口，即係最高平台位，車入面嘅小朋友突然向前跳車！然後呢一家人就停晒喺嗰個平台位塞住整個出口，而企最近出口位係一個身形高大嘅男人

因為條電梯繼續向上攀升緊，好快我就到頂，只能攝喺最右邊位行出條電梯，總算無撞到佢哋，但真係忍唔住超級西面、皺眉頭、大聲「摺」咗聲

隨後成家人就開始發癲：
「小孩就是這樣，你咋啦！」（國語）
「Are you kidding me?」（英語）
重有一堆國語我無聽入耳啦

可能因為我一頭金毛加著得日系傭懶少少，所以都感恩佢哋用埋英文。但其實佢哋咩國籍都唔係重點，因為如果佢係香港人或者外國人咁頂住條梯嘅話，我一樣會西佢哋面

然而當時得我一條女，如果同佢哋五個嘈都只係會俾人噴到一面屁，所以我都係西完佢哋面就即走。不過仍然一邊行一邊都重聽到佢哋喺後邊用國語大聲地繼續鬧

想大家評評理，我知道商場唔係好多升降機，推BB車用電梯重要唔扣安全帶都算，而且任由佢跳車，當下次佢跳馬路，唔通又「小孩就是這樣咋啦？」另外，我唔避佢，唔攝最邊位走就有機會向後跌返落梯，點解妄顧他人安全都重可以鬧人？

我完全無後悔西佢面，只後悔得自己一個唔可以即刻鬧返轉頭

讀者投稿@想大家評理的路人