#ParentLicenses0638

有一家四口，有爸爸媽媽哥哥同妹妹。

呀爸有日講咗一啲想法，呀妹好唔同意，表達咗自己嘅意見。

呀哥就話：「死妹釘！夠膽駁呀爸嘴！」然後郁手推佢。

呀爸可能係因為呀哥支持嘅係自己，所以無出聲鬧呀哥郁手，而鬧呀妹：「講得啱！呀爸講嘢駁咩嘴！」

呢件事之後，呀哥發現只要係出自支持爸爸呢個出發點，原來郁手推妹妹係可以嘅。佢變得好鐘意蝦妹妹，次次都話係教訓佢駁呀爸嘴。

妹妹佢深信就算佢被人蝦，佢都唔應該還手，佢可以同爸爸講。但呀妹同呀爸點講，呀爸都淨係偏幫呀哥：「佢係你呀哥，佢教導你都好應該！」

呀哥日復日蝦佢，呀爸都無理。久而久之，呀哥變本加厲，佢成日借啲意挑釁呀妹，呀妹推開佢，呀哥就一巴星過去。

呀哥話：「佢都有用手推開我，所以我一巴星佢！大家都有用暴力！唔係得我一個郁手！」

呀爸同意呀哥，大家都有郁手，打和。

因為呀妹同呀哥衝突有時會嘈到鄰居，鄰居就問媽咪：「你屋企做咩成日咁嘈？」

媽咪話：「呀妹同呀哥鬧交呀，唉……我就唔識勸交嘅，最驚就家嘈屋閉，家和萬事興呀……有咩爭吵搵番一家之主呀爸解決囉！」

鄰居：「係囉，兩兄妹有咩不和唔應該郁手，應該搵一家之主主持公道！」

呀哥知道鄰居同呀媽都唔幫個妹，仲會譴責呀妹還手，呀哥開始主動郁手打個妹。

個妹好悲憤，覺得無人幫佢，佢響呢個家受盡不公，呀哥每日都打佢，但響呀爸唔幫佢嘅情況下佢只能還手。佢無法離開呢個家，佢好嬲，只好捶牆同撬開家門。

佢呀爸見到佢撬開家門，一巴星過去大鬧：「呢個家係我辛辛苦苦賺錢買番來！你破壞呢個家即係推翻我嘅辛勞！你有個家住已經要好感恩！你有咩應該係開口同我講，而唔係搞破壞！」

鄰居們聽到聲又過來議論：「係囉，小朋友最鍾意搞破壞……」 「小朋友有屋企住已經好好，有啲小朋友無父無母無屋企，佢咁都唔識感恩。」「有咩一家人商量，唔應該郁手！」

響呀哥嘅暴力，呀爸嘅偏幫，呀媽嘅漠視，鄰居嘅以偏概全言論下，呀妹每日身心受創，只係離開呢個家咁卑微嘅願望都做唔到，佢被迫接受所有不公。

佢萬念俱灰地選擇了結自己嘅生命。

靈堂上掛住呀妹微笑嘅遺照，鄰居走向呀媽度：「唉……唔明點解而家呢代嘅小朋友咁脆弱，只係因為同呀哥不和，被呀爸鬧下就自殺，更唔好忘記，係佢自己搞破壞，撬開道門先被人鬧。」

呀媽一路燒衣一路喊：「我都唔知點解……我諗住供書教學衣食住行個女就會好哋哋……我估唔到佢會走上呢條路，我都唔知係咪我哋對佢太好，令佢太脆弱太嬌貴，令佢抵受唔住壓力。」

呀妹讀嘅學校仲為學生搞抗壓班，令小童唔會因為壓力同逆境自殺。

最後，呀妹死亡證出咗，死因係「因不堪家庭糾紛壓力而自尋短見」。

你哋係響呢個故仔嘅咩角色？
你哋譴責邊個？
你哋覺得呀妹死嘅原因係咩？

讀者投稿@K L