#ParentLicenses2233

今日去咗將軍澳一間playhouse度玩，其中入面有一班7-8個八至十二歲左右嘅中童同佢哋父母。班父母就坐埋一邊傾計，而班中童就自己喺play area入面玩

開頭見到班中童用啲大積木封住晒其中一個play area嘅出入口，要霸住個area嚟自己玩。而看住嗰個area嘅所謂職員，其實只係一個七十幾歲陀晒背嘅清潔工友

個工友提咗班中童幾次：「你哋唔可以咁樣封住個入口唔俾人入喎」

嗰班中童次次都話：「得啦！」

「得啦」之後就繼續拎更加多大積木去封住兩邊出入口，最後清潔婆婆都冇好氣再話佢哋

自己霸晒一邊玩夠喇，成班就去咗另外一邊大滑梯嗰度玩，但佢哋之前霸住個area仍然係俾佢哋啲大積木封實晒。最癲嘅係，佢哋忽然拎咗隻倉鼠出嚟，將佢由差唔多有一度門咁高嘅滑梯推落去

肯定唔止一次，佢哋至少推咗隻倉鼠落去五六次，重要成班越玩越興奮，輪流推佢落去

其實喺由佢哋封住個play area門口唔俾其他人入嘅時候，我已經想出聲話佢哋，但老公話又唔知佢哋父母係咩人，我哋又湊住個小朋友，所以叫我唔好理。但我自己細個養過倉鼠幾次，知道倉鼠係極度細膽嘅小動物，好容易會因為被嚇親而心臟病發死㗎！

班大人見到班中童喺度當隻倉鼠係玩具咁玩（之後重塞埋佢落玩具微波爐），但班大人淨係識笑埋一份，完全唔覺得咁樣做係極度有問題

最後真係有其他家長投訴，但投訴內容竟然唔係因為覺得佢哋好唔人道，而係因為隻倉鼠嚇到不停瀨屎整污糟晒啲地方

最恐怖嘅係，我之後聽到其中一個中童講：「𨂽咗佢啦，隻倉鼠應該都好快死㗎喇」

返到屋企之後，我一路好後悔當時唔即場阻止佢哋，亦都好擔心隻倉鼠嘅狀況。當時其實有好多家長都睇到擰晒頭，但可能因為個個都帶住個小朋友，而佢哋又人多勢眾，所以冇人夠膽當面指責佢哋。班細路絕對已經唔細，但好似連做人最基本嘅同理心都冇，亦完全唔識得尊重生命；而班大人有成七八個人淨係識企喺度一齊笑，睇住成班細路喺度起哄，成個情景我真心覺得好恐怖好心寒

其實而家社會有咁多人格有問題嘅人，有幾多係因為佢哋父母助長或者縱容而成嘅？

讀者投稿@嚇到有陰影嘅媽媽