#ParentLicenses2213

今日七月十四日下午三點，我帶住兩個女喺石門上車，而當時我大女就係瘋狂咁笑緊

上車期間遇到一個小學女生，然後呢位小學生問我：「佢好鐘意笑㗎？」

我：「係呀」

小學女生：「我自己唔鍾意笑」

我問：「你點解唔鍾意笑嘅？」

佢冇回應，下一句就問：「你同兩個女女去邊？」

我：「我同兩個女女去迪士尼」

佢：「我自己放暑假都重要補習」

然後我問：「你而家放暑假啦？」

佢：「我未放」

然後佢續說：「放暑假就冇得帶電話」（佢心口孭住個電話）

佢再話：「返學先至可以帶電話，放假唔可以帶，因為媽咪要搵到我先至俾我帶電話」

因為個小學女生喺顯徑站落車，所以講咗幾句佢就落車啦。佢全程都個樣都令我留下非常深刻嘅印象，俾我一個勁悲哀、勁唔開心、承受住好大壓力咁嘅感覺！

我都幾擔心呢位小學生，佢嘅狀態唔多好！我希望佢嘅家長可以睇到，然後關心下佢

讀者投稿@壓力大既小女孩？