#ParentLicenses2180

我一直都有個好戇鳩嘅問題，諗緊出去戇鳩群組問定應該問在座有考牌嘅大家好

話說我有個道德標準非常高嘅中同，每次喺大家聚會後，佢都會分享啲相同片到社交媒體

而問題就嚟喇，佢每次出post都會用emoji遮咗我同我小朋友一家大細嘅樣，遮到有日我終於頂唔順走去同佢講：「其實我哋唔介意出樣，反正都是開心事，冇咩唔見得光」

我中同就好激動咁話喇：「因為我Facebook有好多唔識你同你小朋友嘅朋友，你哋幅尊容吓吓咁流出係好危險，我絕對有責任幫你哋遮返個樣，保障返你哋嘅私隱」

總之佢次次都講到佢啲emoji同保衛地球一樣，拯救咗你哋呢班無知婦孺，你哋重如夢初醒

理解嘅，佢個專頁係佢主場嚟㗎嘛，佢鍾意出咩我又真係吹佢唔脹，不過我哋之間都有唔少中同係共同朋友，有時路過都會認得出emoji下面個body係屬於本尊我，繼而走嚟笑鳩我哋好詼諧

唉，其實佢每次出親新post，啲emoji都令我尷尬到想捐返入呀媽個肚度，與此同時，明知佢係「高人」，我又唔敢挑戰佢條道德底褲喺自己社交媒體赤裸裸咁出大家合照嘅原圖，唔通我又要幫佢同佢個女打返格仔咩？

如是者，我開始少咗約佢。其實都幾可惜，大家識咗咁耐，佢個人其實唔差，係呢兩年無啦啦有鋪遮樣癮

前排，我見佢又有新相同片流出，係小朋友嘅幼稚園畢業全體班相同埋表演。

嘩～頂！係十九個emoji！佢足足用咗十九個emoji去遮住全班師生個樣！其中一個重要係我個仔

嗰種不安程度就好似一張大屠殺劇照，全班得返佢個女係唯一生還者咁。好地地一張畢業相，就咁俾佢搞到好似被怨靈詛咒過一樣

媽，我好亂呀！究竟係我朋友嘅道德觀念太高，還是我自己本身太愚眛？用emoji遮樣是常識而我不知道？我而家俾佢搞到連我隻狗嘅相我都諗緊使唔使打咗格仔先好出post

呢度有冇高人可以指點我迷津？

利申：大家都只是素人，班上亦冇星二代

讀者投稿@一名無知的家長