#ParentLicenses2159

琴日搭UO淩晨機由星加坡返香港遇到一對怪獸父母，當時呢對父母帶咗兩個六、七歲的細路，坐我老公隔離

上機時，理解大家都多行李，惟見到佢哋嘅BB車、玩具車都就咁放咗上行李櫃，而且當中架玩具車喺上機放行李嗰時都跌咗落地下一次。我實在唔明點解咁多行李都唔寄倉，一係就放好啲先

到咗起飛啦，其中一個小朋友係咁咳。佢開頭都有帶口罩，咳到中間個口罩冇咗啦，咳到嘔水咁。後尾聽返我老公講，呢對怪獸父母見個仔咳到咁，重要話對方做咩唔上機裝定水，又話嫌飛機上買樽水貴。臨近landing嗰時，連隔離個大人都開始咳，但都係冇帶口罩

直至到真係等落機之時，大家都會即刻起身拎行李櫃啲嘢出嚟，佢架頭咁大嘅玩具車一分為二拎咗落我老公隻手同佢後面位男乘客個頭度。雖然個老豆有即刻道歉，但我見我老公隻手已經紅咗，我都忍唔住出聲話：「你啲嘢放好啲啦，真係會整親人㗎！」

之後個老母就發晒癲咁鬧返我：「講咗對唔住重想點？你就唔配做人老豆老母啦！」

我冇再同呢對怪獸周旋落去，大家趕住落機又係淩晨關係，雖然我係未做人老豆老母，但係都識做人。你哋大人做得唔啱，細路仔就會學晒，係咪一句道歉就可以淡化自己的錯呢？

最後一句生仔真係要考牌，我只可以講我未夠道行咁樣忍呢一對怪獸

讀者投稿@做人老豆老母唔係大L曬