#ParentLicenses2117

我係一間賣玩具嘅鋪頭員工，每日都會有大量家長帶小朋友入嚟放電，然後自己玩電話，我哋都習以為常

有日星期日，有個大概四至五歲嘅小朋友喺鋪頭入面喊，行咗兩個圈，邊行邊喊，好慘好大聲。我哋嘅同事即刻上前問佢咩事，佢話自己唔見咗爸爸。我哋都比較緊張，問佢記唔記得爸爸媽媽電話，佢話唔記得

當下我哋都想先安慰佢情緒，咁就拎張櫈仔俾佢坐低，拎兩粒糖氹下佢，拎袋玩具仔俾佢玩下，再通知商場保安協助

等咗五到十分鐘，保安嚟到再問小朋友記唔記得屋企人電話，咁可能佢冷靜返落嚟，就話記得。佢講完個電話號碼之後，我即刻打過去通知佢家長，因為我諗佢都應該會好擔心自己小朋友，畢竟前前後後整個過程都差唔多經過成二十分鐘

點知，仆佢個街，我一打電話，就喺隔大概五個人嘅身位，有個玩緊電話嘅男人電話響。我心諗：「唔L係你啊？」我同佢眼神對望咗一下，佢聽咗電話，我嗰下真係嬲到震。但為保公司聲譽，要強忍住啲粗口，當場鬧咗佢一獲

我同佢講：「先生！你個小朋友喊得咁大聲話唔見咗家長，成二十分鐘你都可以唔知，有無搞錯？咁耐你都見唔到自己個小朋友唔見咗㗎咩？你點湊仔㗎，我哋咁著緊幫佢、安慰佢，你企埋喺一邊都可以唔知、唔理，有無搞錯啊？！」

個家長重話自己頭先出咗去唔知，我重嬲。我問佢：「咁你小朋友無跟住你出去你唔知㗎咩？點解可以咁無責任心？你點照顧小朋友？」

其實我聲線已經大聲到在場其他家長都聽到，大家都紛紛指責佢。佢當下第一時間唔係氹返自己個仔，亦都無同我哋講過一聲唔該，反倒係勁惡勁大聲呼喝返個仔叫佢走，但走嗰陣都無拖住個小朋友

真係好多家長覺得「我帶得個小朋友入玩具鋪，你哋員工就有義務去幫手望住」。其實我想講，今次事件係我哋有同情心，但唔代表每一個都會有，下次預著個壞人點算？真係麻煩啲每秒幾十萬上落嘅家長，唔該你點都好，都唔好覺得人哋係要幫你睇住

我哋係賣玩具架咋，唔係托兒所啊，自己小朋友就自己負責返啦！

讀者投稿@賣玩具小薯