#ParentLicenses2110

話說我幾年前喺某小商場內琴行做接待員，有一對姊妹分別約七歲同四歲嚟上二人琴班，每堂六十分鐘

嗰對姊妹十分活潑好動，上堂時會經常行出琴房，喺舖入面周圍亂搞，又會踩琴櫈等等，可以話一堂我都唔知有冇一半時間學緊嘢，即使個鋼琴老師出名好耐性都撳佢哋唔住

老師都建議過家長分開姊妹兩人上堂，主要因為佢哋一齊上堂都比較難集中到，而且年紀太細，六十分鐘課堂對佢哋嚟講太長，就著每人上三十分鐘單人班（學費加埋其實重平過二人班）。然而，家長拒絕老師建議，話唔想分開接送

此外，每次上完堂後，老師於交代佢哋學咗咩時，個阿媽都唔係好聽入耳咁，而下堂啲notes及功課亦係原封不動

講到呢到，其實都唔係話好關我事，係直至有一次放學時，時間過了五分鐘，個家長都未出現，就發生以下關我事嘅事情

當時我就打俾個家長通知佢小朋友已放學，而等候期間我需要搵嘢俾小朋友打發時間，因為我知佢哋太好動，絕對冇可能坐定定等

我陪佢哋玩咗十分鐘後，我再打俾個家長，是次開埋擴音俾小朋友問佢到未，家長話：「喺xx門口喇」（約相隔五至六個舖位）

話口未完，兩姊妹即刻衝咗出門向嗰邊跑，但因阿妹跑得慢啲，我捉得阿妹嚟但又捉唔住家姐，就只好拖住阿妹慢慢追上去

而到咗約兩個舖位左右位置，方見到媽媽已成功接家姐，同時阿妹亦甩我手跑過去。我遠處望實兩姊妹成功去到家長身邊，遂與家長互相揮手示意就返番舖頭

隔咗冇耐收到電話，兩姊妹嘅爸爸打嚟問我叫咩名，續叫我解釋點解小朋友自己走咗去，重話識得報社記者，如再發生就叫我等見報云云

作為小小嘅職員，我只有道歉冇辯解

家長遲到接放學，我已盡我責任看管小朋友，又陪佢哋玩，確保佢哋安全，我錯在冇預計到小朋友講完電話會咁興奮，但我都有確保家長安全接到小朋友先離開，究竟錯係咪真係只在我身？點解我咁都要俾你兇？

補充：琴行舖頭為商場內，非馬路邊，小朋友亦並非走出商場

讀者投稿@小小的職員