#ParentLicenses2100

話說，搬走咗幾年嘅鄰居有個五歲大嘅女，早排遇到佢帶個女返呢頭附近探人，見咁耐冇見就招呼佢哋嚟我屋企坐下

入屋後頭十分鐘，佢個女都叫正常坐定定。我拎咗零食同開咗迪迪尼plus俾佢自己揀卡通片嚟睇，點知過咗冇幾耐，個細路就嚟料

首先，佢擅自入咗我間房

佢入到去，見到張大床好似發咗癲咁，我想帶返佢出房，但佢已經衝咗上床狂跳！

喂！我張床新買㗎！而且從來唔會著住去街衫上床，你搭過車又周圍坐過就咁跳上去，我張床單重要今朝先換！當刻我深呼吸，輕輕叫咗聲：「唔好啦……」再望下佢阿媽

佢媽竟然笑笑口咁講：「你怕污糟我可以同佢返過隔籬換衫㗎！」

WHAT？你唔係應該叫停佢嘅咩？你冇嘢呀？點解重好似覺得個女好可愛，好欣賞佢咁？

我都係自己出聲：「落返嚟啦，咁好危險㗎，跳歪咗就撼親㗎喇！」佢個女先停低，我即刻抱返落床。佢媽繼續笑笑口出返廳，但其實我已經嬲嬲地

其後，好啦，佢個女坐低唔夠五分鐘，佢又走去開我兩個仔間房門，當時佢哋未放學

個𡃁妹見係碌架床，就擒上上層坐下，再落返去玩下層床頭櫃上嘅模型

我再強調，個𡃁妹係著住出街衫！我係咁叫佢落嚟，講明跌咗落嚟就受傷。佢媽又只係笑笑口擺出個懶係無奈但其實歡喜嘅樣，重問佢：「有冇咁好玩呀？」再同我講：「我哋屋企冇碌架床，所以個女好好奇啊」

所以你就任由佢上人張床玩？我要包容？你屋企都隨便俾人入房㗎？我都費事應佢

個𡃁妹落返地，望一望我，好似試我底線咁，其實我係等緊你媽開口話你呀！但佢媽繼續欣賞佢個女嘅行為，喺我想拖返𡃁妹出去之際，佢再開晒書櫃同衣櫃，見到盒board game就攞出嚟，但佢唔係問我而係問佢阿媽玩唔玩得。佢媽就叫佢問姨姨，即係我

頂你個肺！唔忍喇我！

「盒嘢係哥哥嘅寶貝嚟，佢唔鍾意人哋掂，所以唔玩得」個𡃁妹重好似有啲委屈咁望住佢媽，佢媽先出下聲：「哦，咁你放返低啦，我叫爸爸買過俾你啦」

最後，好彩工人姐姐房門本身鎖咗，佢開唔到，佢媽仍然係冇制止

我出聲了：「XX（𡃁妹名），呢間房係工人姐姐㗎，佢知道會嬲你冇禮貌㗎」

佢媽先出聲：「係囉，唔好開人啲門啦。」然後就冇再講多句教落去喇！

呢啲係乜嘢家教？根本係冇家教！我已經冇心機再招呼呢兩母女，於是忍住道氣keep住有禮貌咁問：「你個女平時去人哋屋企係咪都咁hyper？佢都好鍾意入人房同開人啲櫃喎」

佢媽竟然同我講：「如果人哋介意就會出聲㗎啦，咪由得佢俾人話下，下次咪知驚唔會再咁做囉。我都會同人講，介意的話可以除咗佢啲面衫先玩㗎，費事整污糟人哋啲地方啦」

你係咪錯咗重點？真係完全get唔到問題喺邊嗰喎，實情係你個女好冇禮貌呀！你理解力咁低同唔識教，點做人阿媽？

原來你教女嘅方式就係睇下邊個忍唔到，就等人開聲話佢，俾佢「從錯誤中學習」。但Sorry，我冇義務幫你教女，但有權請你走。最後我話就嚟要去湊仔，叫咗佢哋走

今日晏晝，準備出門口之際，又聽到佢哋把聲喺走廊迴盪，我唯有等佢哋走咗先開門，最好以後都唔好見到佢哋

其實最冇家教嘅唔係小朋友而係個媽，睇你幾時害到個女瀨大鑊嘢

讀者投稿@Miss Mama