#ParentLicenses2080

我搬咗入而家呢個單位半年多啲，點知竟然係惡夢嘅開始

本身呢邊屬於郊區，正常嚟講都算靜，但現實不如預期。我單位樓上長期傳出全屋喪跑嘅boom boom聲、重覆以物件敲擊地板嘅聲、拉枱櫈聲等等，而且聲音係持續，跑同揼嘢聲係試過去到凌晨兩點，我亦試過凌晨兩點，甚至4, 5點被樓上拉枱櫈聲嘈醒

上面長期有小朋友尖叫「爸爸」、「家姐」都算事少，間唔中樓上跑幾個字都算係好彩，最難受係成日無間斷兩粒鐘喺屋內喪跑兼尖叫，而boom boom聲就喺正我頭頂

我都有朋友試過遇到家居噪音問題，曾經嘗試去錄低證據但唔成功，然而我係用部iPhone坐喺梳化都將所有噪音錄得一清二楚。朋友形容啲噪音同裝修揼嘢聲有得揮

忍受咗唔短時間後，某晚11點幾，我終於忍唔住打咗落屋苑管理處，管理員亦當場斷正有關噪音由樓上兩位𡃁妹玩緊所致。如是者，管理員勸喻完都冇改善，之後再投訴，樓上更加拒絕開門

管理員一開頭驚嚇親小朋友所以只係叩門，去到撳咗成幾分鐘門鐘先死死地氣開門，佢全程以錄音錄起成個過程

問題仍然持續，我嘅睡眠嚴重地受到佢哋影響，所以我正式同屋苑管理處作書面投訴。然而，只換來樓上租客拒絕接聽管理處電話，另管理處只喺嗰幾層張貼勸喻通告，再話「你有需要就報警啦」，草草去處理我嘅投訴

直到而家，我甚至要食安眠藥瞓覺。有時樓上未返屋企，難得來嘅清靜，我會覺得係恩典嚟！其實乜我屋企唔應該係咁靜咩？每晚放工返屋企，我只係想好好休息，點解就換來一開大門就聽到成間屋boom boom聲

情人節當晚，甚少下廚嘅老公準備咗大餐俾我，可恨嘅係樓上又喪跑兼尖叫兩粒鐘。我嗰晚真係情緒爆咗，迫使我開大個窗大聲鬧上去：「你跑撚夠未啊！？」

其實我選擇經管理處反映，就係想同你地哋和平解決，但你哋卻只係愈來愈過分！

講真，我唔係要求唔俾小朋友跑，我只係希望你哋喺屋企加返張playmat，其實問題已經就可以解決得到，但你哋繼續闊佬懶理，又唔教自己嘅小朋友，咁點解你哋重要生兩件？

有人可能話：「咁你報警囉」，但係我哋一朝早要起身返工，下下報警其實令我哋更加冇得瞓；有人又可能話：「咁你頂唔順你咪搬囉」，其實點解係受害者要去就佢哋，而唔係源頭處理呢？

圖片來源@行運超人
讀者投稿@粉嶺南噪音苦主