#ParentLicenses2078
我係2月5日由香港出發去大阪，來回都係坐香港航空，屬細機型，都真係坐得相當唔舒服
去程時係朝早8點左右，我係坐飛機約中間位置。當時有一家大細上機，當中係一對父母、一個應該都6, 7歲嘅女仔，同埋一個應該兩歲左右嘅小朋友（聽到佢都識講少少嘢），另外重有一個應該係阿姨嘅親戚，總括嚟講係一行有6, 7個人
等上機嗰陣都已經聽到個小朋友係扭計咁樣喊、尖叫等等，已經覺得好慘，如果坐佢後面就重慘，因為就算佢哋坐機頭，我坐機中間都聽到不停有尖叫、喊、打鬧聲，係戴咗降噪耳機都聽到嘅音量，而且情況持續咁樣直到落機
落到機重聽到有對情侶話佢（個小朋友）應該好辛苦先喊，但其實一聽就知唔係，佢上機之前已經係咁嘅狀態，真係火都嚟埋
好啦，都落咗機，以為一切完結啦，點知回程嗰陣等上機又見到呢家人，更無奈重要係凌晨機，而且上到機發現原來係坐我前面
一上機個老母重好認叻咁講話：「全日都無俾佢瞓，等佢上機可以瞓」
我原先諗住凌晨機可以上機休息下，結果都係完全休息唔到。小朋友全程不停喊，個老母就不停拍佢；跌嘢要執返，甚至跌到落後面我個位；瀨屎要問空姐開上面個行李位拎屎片，重要俾我見到個老母伸咗隻手指落去佢個屎片度睇下係咪真係瀨咗屎，結果真係瀨咗屎，而個小朋友剩係着片無着褲，條片又鬆鬆地咁
成日都有人話「點解要怪個小朋友喺飛機度喊」「佢哋控制唔到」之類，但其實有問題嘅從來都唔係個小朋友，一定係老豆老母。呢個小朋友咁樣失控法，我唔信佢係而家先咁，平時都知佢失控啦，點解要帶佢去旅行？你控制到？
其實後尾佢個女都不停扭佢老豆要抱佢落機，佢個女咁大個都咁樣，可想而知佢哋有幾識教。而且帶咁細個嘅小朋友去旅行，究竟真係為咗個小朋友定為咗滿足自己？
回程嗰陣，個小朋友唔多唔少都有因為唔舒服而喊，而個老母都有安慰佢話「無事嘅無事嘅」，即係個老母都知辛苦啦，佢本人都講唔到幾多唔舒服，點解要帶個仔嚟受罪？
讀者投稿@Angry
