#ParentLicenses2056

頭先睇到有一篇投稿關於小朋友去親戚屋企拜年，大人同細路都唔識控制自己嘅文章，令我諗起幾年前我新屋入伙，我老公話佢朋友一家四口想上嚟house warming一事

我老公嘅朋友有一對仔女，當時個仔3, 4歲，正穿著牛仔褲的

個細路上到嚟我屋企已經不停咁走嚟走去，搞呢樣搞嗰樣。佢老豆老母唔控制佢，睇清楚，係「唔控制」，而唔係「控制唔到」。我已經反晒眼，好聲好氣叫佢唔好周圍跑，但佢老豆老母就扮聽唔到

而我唔知個細路嘅屋企人係咪平時「好有家教」咁教佢著牛仔褲要喺幅牆上面用Pat Pat 抹來抹去又揩嚟揩去啦，當日佢就喺我幅白色牆上面用Pat Pat係咁抹來抹去、揩嚟揩去

我有同佢講：「唔好抹牆呀，會整污糟條褲㗎！」

當然佢應該係聽唔明我啲對佢嚟講係外星嚟嘅說話，所以無理我

跟住隔咗一陣，我同我老公加埋個細路嘅老豆老母八隻眼都睇到我幅牆上面有撻藍色嘢。然而佢老母即刻扮睇唔到、扮無事，繼續同我老公傾偈

最後我除咗反眼之外已經俾唔到反應，呢啲父母真係好嘢呀！

讀者投稿@Fossta