#ParentLicenses2024

有日要去九龍公園檢測站撩鼻，行上大斜路時離遠已見到一個嫲嫲級嘅女人、一架BB車同一個細路

女人拎住電話周圍影，個細路推住自己架BB車周圍撞，重跑住咁推住架車唔留力撞埋牆。我見到咁撞架車法都肉痛，然而個女人好似若無其事望完一眼就繼續拎住電話影嘢，所以我一路行，眼尾一路瞄住個細路喺邊，費事佢追撞過嚟

後來我完全無估錯，個細路係會推住架車撞埋嚟我度。正當喺佢未車到埋嚟時，我已經大叫：「小朋友！」

個女人隨即擰轉面望我哋，同時間睇住條靚仔推架車撞埋我腳度，然後佢施施然過來同個靚仔一齊推返開架車，一路望住我一路走，從無打算講「對唔住」！

我同佢講：「撞到人唔識講對唔住㗎？」

佢用流利廣東話話：「咁咪對唔住囉！咁大個人同個細路計較！」

因為喺公園同一個上咗年紀嘅人加細路嘈的話，我牌面點都輸蝕，所以我特登好大聲鬧爆佢：「我而家唔係同佢計較，係同你計較！佢咁細個唔識講對唔住，你係大人都唔識！？」

之後佢話：「係你自己睇住電話無睇路！我電話銀包係拎喺手，但一路都無用過」

我再超級大聲講：「如果我睇住電話我就唔會睇到佢推住架車撞埋牆！同唔會喺佢未撞到過嚟時就叫住佢！」

身邊啲行人開始望住我哋八掛咩事

個女人聽到我話睇住個細路第一下撞架車埋牆就愕一愕然，無嘢好駁，加上開始多人，自己又輸蝕，就話：「你係壞人，你都唔好得去邊！」

我話：「壞嗰個係你，你唔好大教壞細！」

之後佢一路講：「你係壞人！你都係衰人！」一路推住個細路同架BB車走！

其實除咗生仔要考牌，湊仔嗰個都要考牌。自己拎電話，就話我用電話；個細路推住架車有心撞過嚟，就話我唔睇路；我要求道歉，就話我同個細路計較，我係衰人壞人。請問我要唔要90度鞠躬，再呵返架BB車問架車有無事，買埋花膠俾個靚仔定驚？

成個九龍公園咁多老人家同小朋友，個細路咁樣推住自己架BB車搵嘢撞，車到我咪算好彩，但若然咁樣撞跌老人家，到人哋屋企人追究起上嚟時，你係咪又打算話：「咁大個人同個細路仔計較！」

讀者投稿@Kaye