#ParentLicenses2003

疫情期間都無去過長洲，今日就去一去。果然係有好多遊客，商家係開心嘅，住喺嗰度嘅人可能就會覺得煩

事源今日同公公、婆婆、我3歲半嘅女去長洲，途經一間有「長洲地鐵站」之稱嘅甜品舖。相信去過嘅人都知，嗰條路話闊唔闊，話窄唔窄，大約可以打橫放到兩部單車

正當我哋打算入去甜品舖時（我女喺前面，我喺後面，手係拖住），我哋稍為失神，無留意到右邊有部單車嚟緊。佢都為咗避我哋，飛快喺我女面前飛過再停低，我哋都即刻講唔好意思

我一路講唔好意思，我一路拉返我女過嚟我身旁之際，期間只不過係兩三秒嘅事，喺咁短時間下，竟然有個爸爸用手推車突登喺我同我女中間插入嚟，同時大聲叫：「你哋唔好企喺中間啦！」

我當時已經諗：「做乜後面咁大條路，你唔喺我後面嘅路邊行過去，要撞埋嚟隔住我同個女？我咪拉唔到個女過嚟？」

又或者佢可以俾多一秒時間我，讓我向後行到路邊，佢再過都可以，做乜要突登插入嚟我哋中間呢？

但我當時無出聲，只係諗住讓佢行過去先，所以我放開我女隻手，讓佢行先，我之後再拉返個女埋嚟

以為件事告一段落，點知佢一經過咗我後，佢見到公公婆婆，就用趕人嘅手勢，對住當時已經一早企返去路邊嘅公公、婆婆，發悔氣又好無禮貌地講：「你哋死埋一二邊啦，企喺中間做乜呀？！」

我忍唔到：「你有無搞錯？你講乜嘢呀？你用手推車撞埋嚟我都唔出聲，你重要咁講嘢？！對住你兩個女面前咁無禮貌講嘢，重惡人先告狀，你咁樣做我都未話你嚇親我小朋友啦！」

公公婆婆被無理取鬧之下都忍唔住同佢發生口角

個男人竟然話：「你哋唔好掂我呀！掂一掂就跌㗎喇！」「你哋走呀！嚟長洲做乜嘢？」

婆婆都好機警駁佢：「你走！我哋住喺度嘅😂」

當然事實唔係啦😂，呢句係為駁到佢無嘢講而講

兩個老人家根本無掂佢，亦一睇佢個樣斯斯文文，原來講嘢同行為都咁無修養又賤格。我哋就行開唔再想同呢啲野蠻人理論，不過都覺得佢可能見到咁多遊客而燥燥地而已，而且當時重有6-8人喺鋪門口等緊外賣

佢個老婆就一路喺隔離唔出聲，直到我哋散場時，佢老婆先走嚟好冷靜地同公公講：「it’s okay, just calm down」

公公話：「your husband is not a good man」

我聽到忍唔住笑，但我都好認真同返佢太太講：「he actually almost crashed into my daughter」

佢就無理，一句sorry都唔幫返佢老公講。我而家諗返，佢老婆應該都係見慣佢老公周圍撩事鬥非，已經完全係佛系處理🙈

其實香港都靜咗好耐，有遊客嚟一定係唔多唔少影響到當地居民，大家盡量互相包容、互相尊重會唔會好啲？香港人壓力係咪大到心理變態咗呢?

後記：今日見到啲小食檔賣到咁貴都有咁多人幫襯，對於喺長洲做生意嘅老闆嚟講，都係逢假期做一做多少少生意啫，都好吖

圖片來源@香港人.遊香港
讀者投稿@李太太