#ParentLicenses1999

發生自對上若干份工嘅事！每次諗起都令我覺得好唔舒服

某日返返吓工，突然有個目測4-5歲嘅細路女將佢手上個三文治啲餡倒晒落我個位隔離個字紙簍入面，然後若無其事咁食手上剩返嗰兩塊白麵包

另一邊廂，我嗰個平日都幾斯文大方嘅老闆喺老闆房行咗出嚟，個細路女隨即就向老闆揮動個吉嘅三文治盒，興奮咁同佢講：「媽咪！我食完啦！」

我老闆一言不發咁衝咗嚟我個位，指住個字紙簍問個細路女：「你係咪又扔嘢？！」

個細路女話：「冇，係啲餡唔知點解會喺個字紙簍入面」

結果當然係我老闆喺我耳邊對住佢個女大發雷霆！

佢一輪嘴鬧，內容大致如下：
「你咩都唔食！」
「飯又唔食！魚又唔食！菜又唔食！剩係食薯片蝦條！」
「你嘥晒我啲錢呀！」
「你同我即刻拎返上嚟！洗乾淨再食晒佢！」

我個耳膜都幾乎穿咗，但我又唔敢教佢唔好打仔，原本重想拎個字紙簍入茶水間清理一下，咁而家即係……要我原件保留？

接著，有幾個比較高層嘅同事都覺得拎返啲餡上嚟食太過份，就走埋嚟叫我老闆原諒個女啦

「她只是個孩子呀！」高層同事們說

佢哋同時又叫個細路女：「你同媽咪講對唔住，話下次唔會啦！」

個細路女非但冇講對唔住，反而係攬住嗰個同事，個身係咁震，成隻貓仔咁

結果有個印傭上咗嚟，個細路女又即刻撲向個印傭，望都唔望佢媽咪

喺個印傭即將要帶個細路女返屋企之際，我老闆又喺度大吵大鬧：「你唔好以為就咁算呀！我今晚要打你十下！」

去到呢個位，我到而家都認為，冇繼續打呢份工係啱，乜原來佢真面目係咁得人驚！

其實你屋企唔好買零食，咁個女咪唔會食薯片蝦條食到唔想食正餐囉！

更甚係，你喺班員工面前都可以咁樣教訓你個女，咁你平日又會點對待你個女呢？我都有啲擔心

圖片來源@破壞之王
讀者投稿@小薯仔