#ParentLicenses1410

話說我老公一家都幾奇葩，我老公排行最大、姑仔第二，叔仔排最細

叔仔成幾廿歲人乜都要家姐同阿哥幫手。例如係佢唔鍾意食自助餐，嫌要行出行入，緃使係奶奶生日想食都要就佢——總之成家人都要就佢

呢樣惡習即使到叔仔有咗個仔後都毫無改善，竟然仲變本加厲用喺下一代

我有三個女，姑仔有一個女，而叔仔生嘅小朋友喺呢代排第四。而家佢個仔升K2，姑仔同我第二個女升小二，我大女升小四

叔仔同佢老婆覺得生咗個仔，而且又係唯一男丁，個個都要就晒佢個仔

返親奶奶度食飯，叔仔個仔實會扭計、大吵大鬧，出手打人、推人、搶嘢等等之外，仲會話啲女仔唔同佢玩，野蠻行為數之不盡

最令人氣憤係我老公、姑仔同叔仔永遠都用萬能key「男仔係咁！」「佢仲細就下佢啦！」

我戥啲女好委屈，都有時忍唔住，出聲串下佢哋

正正上星期日返奶奶度食飯，叔仔捉晒3個女仔閉門訓話。以下係佢哋事後同我講

（叔=叔仔，女=女仔們）
叔：「你哋點解唔同佢玩呀？」

女：「我哋玩緊，佢話唔玩，要我哋陪佢玩扮PJ同玩車，我哋唔想玩呢啲喎！」

叔：「就下佢囉，仲細嘛」

女：「而且佢咁冇禮貌，我唔想同佢玩」

叔：「佢仲細，唔識啫，就下佢啦！」

女：「咁佢永遠都細過我哋，咪以後都要就佢？咁幾時先大？幾時先識？」

叔：「佢讀K1咋，仲未識㗎」

女：「吓，我哋未讀幼稚園之前都知喎，做錯嘢都會道歉喎，咁佢幾時先學識？」

叔：「佢仲細，而且佢係唯一一個男仔嚟㗎，佢將來生啲仔女會同我一樣姓，你哋生啲小朋友會跟人哋姓」

女：「唔明，媽咪同我哋講要乖同有禮貌，唔係大個得罪人，會俾人打死㗎，咁死咗點生小朋友呢？」

叔：「唔會，你媽咪都冇生到仔，佢又點會知呢？總之你哋啲女仔個個一定要同佢玩」

女：「咁你生多一個細佬妹同佢玩囉」

迫人哋同佢個仔玩都算啦，而家咩年代呀，生咩性別關你鬼事咩！？

讀者投稿@三寶之母