#ParentLicenses1970

其實我一直覺得喺網上批評其他父母嘅parenting skills，好似冇乜品，特別重要係拍埋片嗰隻。再者，自己亦唔係聖人，撫心自問可以憑乜嘢去話人哋？

但有件事真係煩擾咗我兩個幾月，唔講出嚟真係好唔舒服

每星期有一日我都要帶自己小朋友去游泳班。於放學時間，更衣室內總會逼滿好多家長、姐姐同小朋友喺裏面冲涼、換衫

因為呢班游泳班中大部分小朋友都係10歲以下，所以好多小朋友都係企咗上去張長櫈上，讓大人幫抹身同著衫時會比較容易，但除咗其中一個「小朋友」……

目測呢個「小朋友」大約都有11, 12歲，我雖然唔肯定年紀，但依高度睇我就好肯定5呎2吋，因為佢同我一樣高

佢同其他小朋友一樣，每次游完水，佢都係企咗喺張長櫈上，俾佢嘅工人姐姐幫佢抹身、換衫

但你知唔知一個5呎2嘅人，企咗喺泳池更衣室嘅長櫈上係有幾高？而幫佢抹身嘅工人姐姐，應該最多只有5呎高

姐姐每次都要伸長手腳去抹「小朋友」嘅臉，但係掂唔到小朋友嘅頭髮。至於所有衫都係由工人姐姐幫手穿上，個「小朋友」喺唔使點郁。另外每次個「小朋友」只會用一條毛巾包住個頭就離開

個媽媽（唔肯定，不過應該係）就全程交叉雙臂，企喺姐姐後面，郁都唔郁，只會睇住姐姐幫個女著衫

「小朋友」著完衫後，個媽媽帶埋佢就會立即離開更衣室，姐姐就留後收拾。兩母女從來唔會等埋姐姐，一直走一直走，亦從未見過佢哋會望返轉頭，睇吓姐姐喺邊。通常行到某個位，姐姐就會「趕上」

每一個星期嘅嗰個時候，我都會睇到眼火爆

一、泳池更衣室（係學校泳池，唔係公眾泳池）地方已經好細，成日水泄不通，唔使幫忙嘅人係唔係應該喺出面等？

二、咁大個「小朋友」都要企上櫈上叫人幫你換衫，係唔係身體有問題？若然身體有問題的話，點解又會識游水？

三、嗰女唔識郁，個呀媽又唔識郁，「廢」病其實係咪有遺傳？

四、工人姐姐只係你嘅僱員，唔係你奴隸，俾返少少尊嚴人哋，等一等，一齊行，甚至可以幫手攞少少嘢，得唔得？

讀者投稿@Allison