#ParentLicenses1965

食飯個啲又帶住狗狗嘅大部份只可以坐室外，坐室外就自然令經過嘅人會望到我隻狗狗。大部分人見你食緊飯都只會望下隻狗，只有少部分人會上手撩或摸我隻狗

通常我哋食緊飯時唔會想俾人搞住晒，至於狗狗乖乖坐得到喺度係只限冇人搞住晒嘅情況下先做到；當有人撩佢，佢就會郁，係好正常嘅行為。只不過狗狗郁時，你唔可能唔理佢，你就又要安撫佢坐低，就好似小朋友食飯郁嚟郁去咁。所以當有人喺我食飯時搞我隻狗，我一般會禮貌講聲：「我哋食緊飯，食完飯再同你玩吖」

然而，今日有個媽媽真係好煩，佢個小朋友行都未行得穩，要個呀媽兩隻手扶住行，問都冇問之下就行過嚟想摸隻狗

我哋都係一貫地禮貌回應：「食緊飯，食完再同你玩吖」

個呀媽竟然完全無視我哋呢句說話，照搞隻狗

我都嬲嬲地，即刻抱起隻狗，就話：「隻狗咬人㗎，唔好摸呀！一陣整親你個B」

接著，個呀媽先話：「佢好想同你隻狗玩，可唔可以俾佢哋玩下？」

我回覆：「唔可以，因為我哋食緊飯，佢郁嚟郁去好影響」

其實都講到咁，醒目識趣嘅都走啦，但佢竟然話：「玩下都唔得，你隻狗咁巴閉就唔好帶出街啦！」

本來我男朋友係冇出過聲，一聽到佢講呢句就火都嚟，隨即就話佢：「煩夠未啫，咪話咗食緊飯唔想玩囉！係咁巴閉呀，走開啦，呀姐！」

未幾，企喺佢側邊玩電話嘅老公先過嚟拉返走佢老婆

其實整個過程佢個小朋友都冇乜點表現想同隻狗玩，完全係俾個呀媽拉咗過嚟而已。將心比己啦，你食飯會唔會想有啲陌生人過嚟搞住你個仔？重要又要摸佢又剩？擺到明食緊飯，而且都出埋聲講食緊飯，就自重人重啦！

讀者投稿@食緊飯可唔可以唔好騷擾人