#ParentLicenses1406

小巴車費照妖鏡

今日小巴上演一場有禮司機vs無牌家長vs正義乘客之事，幾蚊車費足令家長醜惡之心表露無遺

甫進小巴無耐，司機問咗幾次：「係咪有人未俾錢？」

一眾乘客懷疑自己未嘟到八達通之時——

司機：「有位夠咗三歲嘅小朋友未俾錢啊（小朋友著住校服，佔咗坐位）」

家長：「啱啱夠三歲多幾日咋嘛！咁計較，少少錢咁緊張！」

家長用純正廣東話講嘅

司機：「我哋揸綠色小巴嘅都唔係自己袋，公司規矩嚟嘅」

家長：「幾蚊都咁計較！畀咪畀囉！嗱，呢度呀！」

家長剛入錢之時，有位乘客道：「太太，夠三歲就要俾錢㗎喇，我小朋友都係咁，我諗你要習慣下」

家長：「咁我而家咪畀咗囉，仲嘈乜嘢！你哋唔好咁執著啦！」

司機：「你頭先上咗車10分鐘都未畀啦，唉」

乘客：「太太，身教好重要，呢啲係規矩嚟，你咁樣會教壞小朋友」

家長：「而家我係咪未俾錢先！？司機平時啲朋友都上車唔俾錢啦！雙重標準！」

乘客：「7000幾蚊一個月學費就肯畀，幾蚊車錢喺度嘈。做家長真係要考牌」

之後家長因寡不敵眾就中途嗌落車

基於佢上車地方四圍都係貴價私樓地區，有理由相信家長出身應該唔寒酸

司機咁好禮貌，仲畀晒落台階，真係面係人哋俾，架係自己丟

讀者投稿@花生小巴乘客