#ParentLicenses1948

我阿媽係一個生仔未考牌嘅人。佢有兩段婚姻，分別生咗兩個女，而我就係佢同第三個男人所生

我阿媽佢基本上從來都冇出去做嘢，都係靠我兩個家姐同我所謂嘅老竇俾錢生活。我嘅一日三餐幾乎都係樓下茶餐廳解決，由M記養大我。兩個家姐都經歷過婚姻失敗，唔多唔少都係因為受我阿媽間接影響，例如當兩夫妻有拗撬、為小朋友而嘈、為錢銀而煩，我阿媽就叫個女離婚，再搵過第二個男人

喺我阿媽眼中，「婚姻」應該只係收入嘅來源，仔女係「籌碼」。可能因為我係仔嘅關係，咁多年來佢都幾錫我，我都係被寵成飯來張口嘅小朋友

而家我已經長大，讀緊大學，認識咗好多唔同嘅同行朋友。經過了解過佢哋嘅成長背景同家庭環境，我就覺得自己好特別

我成長於一個偽單親家庭，長期都冇父愛，雖然老竇都好錫我，但可惜唔可以一齊生活，我只有當每個月阿媽收生活費嘅時候先會見到佢。以前我細個時，老竇話我大個就會明白，而家我真係好明白

大學時期我喺宿舍住，好快我就出來做嘢，就諗住同同學一齊租個單位，打算好好做嘢賺錢，希望擁有屬於自己嘅生活。然而，喺呢個時候，我阿媽親情勒索我

我阿媽用佢嘅公屋資格去買居屋，我未畢業竟然就要孭住四五百萬，重話預我每個月要俾萬八蚊家用去供樓。後來我向我家姐打聽過，都一樣係要加家用

你要一個單親媽媽、湊住小朋友、冇老公嘅情況下，重要俾咁多家用你，你係咪傻L咗？！

阿媽同我講：「層樓而家冇你名，但得你一粒仔，死咗之後就會俾你，第時結婚要喺度住，老婆幫手供樓大家就輕鬆好多」

因為家庭嘅問題，我真心冇信心去結婚，為咗下一代我應該更加唔會生仔。而家甚至連我想過嘅生活都被安排，我覺得我嘅下半生已經玩完

讀者投稿@廿歲仔