#ParentLicenses1896

今日中午放學時間，我帶我女去玩具店行下，都頗多人

該玩具店唔算非常大間，我估都大約有1千尺左右吧。店面依一般典型布置，啲排架排列成一條條巷咁嘅

當時有三個媽媽揹晒書包咁企正喺店鋪嘅正中央，恰好係所有巷嘅交匯處度傾計吹水，完美咁擋晒四個方向嘅路，期間幾次行到嗰個位我都要兜路行

而我估計佢哋應該帶住五至六個小朋友吧，因為幾乎所有小朋友都跑嚟跑去，想認真數都做唔到。小朋友有小朋友跑，媽媽有媽媽企喺度高談闊論，我行過聽到類似講緊點樣谷個仔入某名校之類嘅內容

其中兩個年紀較細，目測3-5歲嘅妹妹就不斷圍住啲貨架喺度跑，跑嘅中途經過每個架就拎起一件物品扔落低，我眼見嘅都扔咗3, 4件，另外聽聲有貨跌落地嘅都好幾件

我見到有兩個店員，一個係不斷咁跟住個妹妹，遂件遂件執返個妹妹扔落地嘅貨，另一個就係追住個妹妹跑，但又唔敢出聲

其實整個過程都持續超過5分鐘以上，但三個亞媽係完全無理過

未幾，其中有一個仔就去扭亞媽買玩具，亞媽係果斷拒絕咗嘅，重話：「你再係咁就即係迫我打你！」

語畢，轉頭繼續佢哋嘅高談闊論

個男仔就嬲爆爆，企喺隔離不斷抱怨，細細聲講：「次次都係咁，次次都話唔得，次次都話下次，次次都話叫老豆嚟買，呃人嘅！」

男仔一路講，隻手一路係一拳拳咁打落佢想要嘅嗰個玩具度，然而嗰個亞媽依然係無理佢

甫見到咁混亂嘅場面，我就叫我女：「走啦……此地不宜久留」

呢班老母都算穿得身光頸靚，不過要吹水的話，我建議你哋去公園，唔好企正喺中間阻住晒。另外，你班𡃁仔拆緊人間鋪，點解眼尾都冇望下？真係俾你個仔入到名校又代表到咩呢？而且呢啲扔玩具落地嘅行為，我估都唔係第一次吧，點會順手得咁緊要，班職員到我走都只係敢怒不敢言

完美演繹「只要自己唔尷尬，尷尬就係別人」

讀者投稿@無眼睇