#ParentLicenses1860

自從迪士尼有咗個煙花匯演之後，有個迪士尼分享group就成日見到啲父母出post，又俾建議又公審人哋。以騎膊馬為例，又話遮住後面啲人，又話建議人哋個個都坐低，因為小朋友玩完一日好攰，如果個個都坐低就唔會遮住等等，總之不外乎都係話人哋點樣遮住佢小朋友睇，話人哋自私之類啦

其實我都係人哋父母，我小朋友都係得兩歲，但呢個世界唔係圍住你個小朋友轉

當日我哋為咗睇場煙花，即使落住雨，我都係一手拎遮，一手抱住小朋友，等咗差唔多兩個鐘就係想霸到個靚位。不過我唔係話我咁做好偉大，我只係覺得想睇又唔想俾人遮到視野，點解唔自己一早去霸位？自己小朋友攰的話，咪一係大人抱住，一係就唔好睇，又點解要人哋去遷就你呢？

成日話人哋外國都坐低睇，喂……人哋外國嘅迪士尼大幾多啊，你又知唔知？！一陣完場起身發生踩人事件，又會大把人怪個樂園安排

從來想要嘅嘢都係要付出代價㗎啦！點解咁簡單嘅道理，你都已經做人父母都唔明，點教下一代啊？

只識得成日話人哋自私，其實呢班家長先最自私，好好反省下啦！唔該！

圖片來源@香港釋迦牟尼樂園
讀者投稿@大家都係父母