#ParentLicenses1856

人哋老竇都會去讚一讚自己啲仔女，但我個老竇就偏偏唔係

我老竇把口好似永遠都唔識讚人咁，無論好事定係壞事，佢都可以話我一餐。比如話上次，我終於通過咗樂理嘅五級考試（前後考咗三次先過），所以都幾開心下嘅，就同老竇分享一下

但係老竇都唔係讚我、鼓勵我，只講：「你考得太低分，你都只係啱啱合格，有咩好講？」

又例如話做完功課喺度玩手機咁。佢見到我喺度玩手機，就即刻喺度話我成日玩手機、成日玩手機，又話乜嘢冇前途，我係條廢柴嗰啲說話

即使我同佢解釋都冇用，因為佢唔認為或者係唔信我已經做咗功課

大佬呀，好心你唔好將眼前啲嘢當成事實丫好唔好？人哋解釋又唔聽，成日都活在自己的世界

我其實好明白你「可能」係關心緊我嘅成績，但你可唔可以講嘢嗰陣換過方式呢？同埋你把口係咪真係唔識讚人？我上到中學以來，從來沒有聽到你讚美我嘅說話，就算連少少鼓勵嘅說話都冇

我都嘗試令自己換過角度去諗，但係我做唔到呀！我到底做錯啲乜嘢啊！？點解你可以一句讚美嘅說話都唔講出嚟？一句鼓勵人嘅說話都唔講？只係識用言語去貶低我？係唔係我喺你嘅眼中就係一條廢柴？垃圾？

我想問吓你，點解你要咁對我啊？！

讀者投稿@小K