嚟緊9月升K3，眨吓眼就要開始準備小學嘅嘢，記得報考幼稚園係冇幾耐之前嘅事！當時都透過唔同渠道蒐集資料，再慢慢研究分析。
身邊有啲朋友預備懷孕時計算得好準確，希望BB喺年頭出世，可以做「大B」。本身熹熹預產期係1月尾（雖然唔係特別計劃），但佢最終早產，12月頭就趕住出世，由「大B」變做「細B」。雖然唔係一心要做「大B」，但到預備幼稚園，就係一個要考慮嘅因素。
【一般9-12月出世，未足三歲入學就係「細B」，大一年先入學就係「超大B」；而「大B」通常係指年頭出世。1-8月出世，普遍會跟番同年入學。呢樣亦同升小學「適齡學童」嘅分數有啲關係，有機會可以再解釋】
幼稚園八月尾開學，教育局規定入讀幼稚園K1最低年齡係兩歲八個月。同一年由1月到12月出世嘅小朋友，都可以同一學年入讀幼稚園。
舉例：熹熹2017年12月出世，可以同其他2017年小朋友一樣2020/21學年讀K1做「細B」（兩歲八個月入學）；亦可以2021/22學年讀K1做「超大B」，開學時三歲八個月。
年尾出世，邊年入學，當中都有不同因素要考慮。例如心儀幼稚園收生要求、小朋友性格、家長取態等。部份幼稚園收生範圍係由9月出生開始，呢個情況下細B可能會比較輸蝕，有機會比較多上一年9至12月嘅小朋友做「超大B」，同細B差距一年。
一啲比較着重學術嘅幼稚園，家長可能會擔心細B能力（包括認知、小肌肉發展等等）唔及其他同學或者追唔到學校程度，選擇做「超大B」。
開始讀書前，我就已經發現熹熹鐘意同比自己大嘅小朋友玩、跟佢哋學習，亦都肯嘗試，失敗咗願意再嚟過，做細B可以跟其他比佢大嘅同學學習，令佢進步得更快。有啲小朋友好需要認同，想所有嘢都做到最好，可能會比較適合做超大B，大一年入學會比較得心應手。家長可以細心留意小朋友，再分析邊一樣會比較適合佢。
睇住小朋友成長，會見到佢哋有好多估唔到嘅可能性。相信父母都會用心幫小朋友選擇，甚至緊張過自己嘅嘢！
喺決定之前，最緊要係要知多啲，不妨先上教育局有關幼稚園幼兒班（K1）收生安排（https://www.edb.gov.hk/tc/edu-system/preprimary-kindergarten/kindergarten-k1-admission-arrangements/front.html），同埋瀏覽心儀學校嘅網站了解多啲升讀幼稚園嘅資訊。
本文為作者評論意見不代表《生仔要考牌系列》立場
作者：Mavis Wong
FB：湊熹攻略。湊熹媽媽
