#ParentLicenses1803

見大家最近都講緊自閉症，我又想分享下幾年前嘅一單見聞

我家姐嫁咗同搬咗出去住，但間中會帶個女返嚟食飯。有次我帶當時只有5歲嘅姨甥女去散步，離遠有個女人用狗繩拖住芝娃娃。姨甥女想走埋去，但我怕狗，一來覺得芝娃娃細細隻但都幾惡，二來驚細路女唔識性整親人隻狗。於是我抱住姨甥女同佢講：「我哋遠遠同狗狗say hi啦」

當時隻狗淨係呆咗企喺度，點知突然旁邊衝咗個男仔埋嚟，一腳踢落隻狗度，成隻飛開同慘叫😵😵，我同個主人都一齊嚇到尖叫

主人即刻攬住隻狗，再大鬧個男仔，疑似係男仔嘅家長走埋嚟：「對唔住，我個仔有自閉症控制唔到自己」

主人喊晒，抱起隻狗，拎電話出嚟打，同時一路話：「個細路點可以踢隻狗？！」

疑似家長就趁主人打電話時，就即刻拉個男仔走入屋苑內部

相信當時主人應該都唔理得佢哋咁多，我聽到佢call的士去寵物醫院，跟住跑向街外方向

成個過程好快，可能只有一兩分鐘，我都唔識俾反應，同姨甥女兩個都呆咗企喺度

姨甥女問：「狗狗係咪死咗？」

救命我都唔知，我同你一樣咁驚嚇😨😨，但作為佢身邊唯一嘅大人，我唯有頂硬上同佢講：「冇事嘅，狗狗醫生會醫好佢」

我同時都不忘同佢講：「千祈唔可以咁樣對小動物」

後來我哋即刻返屋企，但我諗佢受驚嚇嘅刺激都唔細，成晚悶悶不樂。然後全晚我阿媽同佢阿媽就不停安慰我哋兩個🤦🏼‍♀️。而之後我冇再見過個主人同隻狗，個細路都冇再見過

雖然成日話要理解自閉症兒童，但邊個理解隻狗同個主人？一個無啦啦俾人兜腳踢，一個無啦啦自己寵物俾人兜腳踢；又有邊個理解我姨甥女？散個步都見到咁嘅場面🤦🏼‍♀️🤦🏼‍♀️🤦🏼‍♀️

圖片來源@鹿鼎記2之神龍教
讀者投稿@人哋阿姨