#ParentLicenses1794

啱啱睇到一篇關於不育嘅投稿，有感而發

延伸閱讀： #ParentLicenses1789 https://backup.parentlicenses.hk/?p=2364

我諗我明白該事主嘅感受，因為我有段時間都不能成功生到小朋友；但我經歷有啲唔同，我係多次成功懷孕，然後流產

喺嗰段時間都「好好彩」地有好多親戚朋友陸續報喜。最慘嘅係，佢哋發放幸福時，都會不停追問：「你打算幾時生？」呢句隨口而問嘅問題，對我嚟講，唔止喺傷口上灑鹽，直頭係灑砒霜

點解唔同佢哋講我嘅感受？因為最親嘅親人，最好嘅朋友都知到我發生咩事。但係唔係至親我就唔想解釋，曾經試過兩邊父母都同我護航，托說我同老公想多幾年二人世界先，但幸福嘅人永遠唔知自己有幾曬😎

問心，喺嗰段時間，我真係好唔想見到大肚婆同BB

其實流產嘅女士，佢唔會有產假，搭車都唔會有人讓座。反之，有大肚婆要坐，唔讓就會俾人睥。只不過係實況無人知，其實流產嘅女士嘅身體都好虛弱，企多陣都會暈低。若然唔係為錢，都唔會頂硬上返工，唔好講話搭的士

講咁多，我唔係想博同情，只係想回應點解唔做人工受孕。因為我嗰時都有朋友做人工受孕，佢話我知女人要承受有幾多苦，又身心俱疲，都仲要返工咁上下，而且又未必一定會成功

另外，我同老公都有諗過收養嘅問題。我同老公都唔介意血緣嘅問題，但長輩介紹，咁我哋又覺得如果佢哋唔可以當我哋收養嘅小朋友當係親生，咁我會唔會對唔住我領養嘅小朋友？

不過我好好彩，喺呢段時間，有個兩歲嘅小妹妹打開我心窗——佢係我老公嘅外甥。因為我身體唔好，我經常匿埋喺房，呢位小妹妹一開始就偷睇我。每次嚟就偷睇我做咩，慢慢就越來越大膽，走入嚟，請嘢我食，走上我床，不停問「咩黎㗎？」之後當然會攞我啲嘢玩，攪我電話（唔好話佢媽無考牌，其實係我俾佢玩），我同佢關係越來越close ，甚至乎我當咗佢係我個女。佢完全係我嘅angel，閃亮咗我個世界

最後我想講，如果緣份未到，何不對自己好啲，做啲令自己開心嘅嘢，聽少啲其他人嘅講法，小朋友始終係種緣份，可能會從另一種形式嚟到你身邊

如果你已準備足夠成為別人嘅父母，你到底想為佢做啲咩？而唔係想佢可以俾啲咩你

讀者投稿@無名