#ParentLicenses1786

我自己有小朋友，有時都會遇到啲情況唔識處理，所以即使自問無愧於心，都唔敢話自己係一個有牌家長，唯有話自己係P牌

最近發生咗呢件事，真心想請教一下大家我應該點處理，先唔會令自己小朋友留低陰影，同時對家小朋友又唔會掃興

事情發生喺某主題公園，我小朋友3歲，坐住BB車，手攞住泡泡槍。我啱啱有啲嘢要處理，所以企埋一邊用緊電話

呢個時候有一男一女，應該同我小朋友差不多大嘅小朋友出現喺我哋前面。其中個女仔二話不說就走埋嚟撳我小朋友支泡泡槍（當時無開住），而我小朋友應該被嚇親，攬實支泡泡槍望住個女仔，個女仔又繼續摸泡泡槍；此時，個男仔就係咁想拉個女仔走，我估個男仔應該係知道唔可以咁樣搞人哋啲嘢

我望咗周圍都唔見有貌似佢哋家長嘅人，就開口問佢哋：「你哋屋企人喺邊呀？」

兩個細路無視我，女嘅繼續搞我哋支泡泡槍，男嘅繼續拉個女嘅走……然後個女仔開始變本加厲，企圖撥開我小朋友隻手，想私自攞起泡泡槍（唔排除佢係想攞上手玩，但我嘅感覺係佢想直接搶完就走）

我：「小妹妹，呢個係我哋㗎喎，你如果想玩可以出聲，我哋借俾你撳下，同埋你哋屋企人喺邊呀？」

然而，兩個細路繼續係無視我。跟住落嚟嗰一分鐘，我小朋友好全力咁攬實泡泡槍，我就喺隔離出手撳實，同時搵下周圍見唔見佢屋企人。個女仔就越嚟越大力，仲開始想撥走埋我隻手，個男仔都係繼續喺度抆女仔件衫，想拉個女仔走

喺我準備對個3歲小朋友開拖嘅時候，一個貌似阿媽嘅人終於出現。佢離遠對住兩個細路大叫咗好多次：「NoNoNo……No」

貌似阿媽嘅人埋到嚟直接抱走咗個女仔，男仔自己跟住後面，留低我同我小朋友兩個呆咗喺度。係，個貌似阿媽嘅人淨係捉走兩個細路，一句Sorry都無

過咗兩日之後，我小朋友仲會講緊：「嗰日呢，有個小朋友想攞呢個，然後另外有個小朋友想拖走佢，嚇死我」

如果大家遇到呢個情景，會唔會同個大人講咩事，要求佢道歉？大家又會喺個大人出現之前會點處理？

我有諗過大力撥開個女仔，然後推車走，但又驚整親或者整喊人哋個細路（當時佢哋企正喺BB車前面）；又諗過大聲問「邊個係佢屋企人，佢細路想搶嘢」，但又驚俾人話我蝦細路

竟然喺太多顧慮之下，就變咗嚇親自己小朋友

圖片來源@逃學威龍2
讀者投稿@P牌