#ParentLicenses1778

我見到咁多投訴怪獸家長嘅post，我都忍唔住要分享一個怪獸老母

讓我介紹一下自己，我本人喺新界區開芭蕾舞學校，而我哋學校每年都會舉辦一個周年匯演活動

舉辧周年表演需要成本包括租場、道具、交通等等，所以每位想參加表演嘅小朋友會每隻舞收三千蚊表演費，若然參加表演兩隻舞就六千，費用公開，成件事好公平

再簡單講下嗰位媽媽同佢個女嘅背景。佢個女資質一般，又蠢又懶，又肥又玻璃心。因為佢資質麻麻，所以喺上堂會嚴厲督促佢。相信好多同行都明，要管理秩序，一定要鬧，以建立老師威嚴，否則小朋友唔受教

一直都正正常常，隨着表演日子將近，學校開始籌備表演，同時怪獸家長開始發作

有次放學之後，佢會打電話嚟同我講：「做咩鬧到我個女喊？！」

我同佢講：「我哋係嚴㗎喇。基本上，嚟得學嘢，就應該預咗俾人鬧先學得好」

不久之前，該名家長曾試過投訴我針對佢個女肥，指控我言語攻擊佢個女，令個女失去自信，根本其實係佢個女玻璃心！

我忍唔住同嗰位媽媽講：「你個女資質有問題，老師教學無問題。如果要建立自信，可以試下參加學校表演，上台經驗係最好培養自信方法」

嗰位媽媽就幫帶佢個女報名

睇到呢度應該有人會話：「你拒絕佢，唔教佢咪得囉」

其實當學生有需要，做老師一定會幫忙，只係冇諗過，咁樣會令到怪獸媽媽當老師係商業關係，當你俾唔到佢心中所期許就當你衰人

出事當日，發生喺疫情前嘅學校周年匯演。表演完後，個家長發爛渣：「做咩我俾咗三千蚊個女做二打六，另一位學生報跳多隻舞，就可以企中間？！」

續：「你喺後台鬧人無熄咪，你做咩鬧我個女？我個女話俾我知你鬧佢！我喺觀眾席都聽到！」

再質疑：「我查過你無teaching cert，你有資格教人嗎？」

我解釋因為我哋book咗埸地演出，安排旅遊巴接送小朋友，運送演出物資，即使排練都好，總成本都好高，收三千真係成本而已

其次，另一位企中間嘅小朋友，佢跳嘅舞數目多，佢跳得多，自然跳得比其他人好，所以安排企中間。我哋安排演出台上位置，係根據舞蹈上的排位，並唔係佢俾多啲學費所以企中間

最後，我雖然無teaching cert，但我有多年教學經驗，學生參加比賽獲得獎項！

根本係呢位家長不滿意自己個女表演企旁邊，而托詞質疑教學質素。之後更話個女好唔開心，而最後退學，放話我哋係黑店

既然個女咁玻璃心，咁唔鬧得，就唔好返學學任何嘢，一世困喺屋企度啦！

讀者投稿@雪芳老師