#ParentLicenses1753

我開琴行嘅，本身開咗一間（略稱為「正校」），幾年後喺同區再開一間（略稱為「分店」或「分校」），兩者相隔都頗遠的

為慶賀新分店開業，同時為推廣，就用優惠價這手法吸引新學生，為期一個月。當一切都覺得正常嘅時候，我竟然被一個家長纏上，真係令我無話可說。事情是這樣的……

分校有兩個家長同小朋友報名，他們倆關係是朋友，一個介紹另一個。這兩個家長十分客氣，我對他們的印象良好。另因為他們是於分店推廣期間報名，當然學費會比較優惠

有一日，我回正校準備下班時，燈也熄了，有一個舊生家長（其小朋友學了一段時間）突然大力推門入內，目露凶光，一開聲就盤問

家長：「喂！你而家學費咩價？！點解同一級程度，你哋平咁多！你黑店嚟㗎！回水！」

我當時唔知佢講梗咩，心諗：咩呀？

我面帶笑容😃：「家長，唔好意思，你講咩學費？我唔係好明你講梗咩」

家長：「呀邊個同邊個（分校新報名小朋友），點解佢哋咁平！你間黑店嚟㗎！」

我好有禮貌咁解釋，面帶笑容😃

我：「唔係，其實佢兩個喺分別推廣期報名，所以學費先唔同啫」

家長：「咁你唔同我講！？」

咩呀？

我：「同你講？」

家長：「講有優惠呀！」

我：「但優惠講明只適用分店，同埋優惠期都過晒喇……」

家長：「我唔理你咩分校正校，一句講，一係退返錢俾我，仲要之後收我優惠價，唔喺我唔會再俾個仔喺你間嘢學！為人師表，呃人錢！」

我已經知咩事，擺明搵著數

我：「家長，唔好意思呀，冇得咁㗎，你可以之後唔學，但之前上口咗堂嘅錢無得退㗎」

家長：「唔退全費，都要退差額！」

我：「家長，唔好意思，真係唔得」

家長：「你叫你哋老細同我講，我再同你講都嘥氣！」

我：「唔好意思，我就係老細」

家長：「你唔好以為你咁講，我就信，會唔投訴俾你老細知呀！」

我：「唔好意思，我講真嘅，你唔信，我都無計」

家長：「黑店！黑店嚟！你有冇見過麥當勞會間間優惠唔同！？人哋都大把分店，你得一間垃圾分店，以為好巴閉呀？」

佢仲想講，但即刻被我打斷咗

我：「麥當勞又真喺有啲分店唔同價錢㗎喎，你唔知？」

我係用好溫柔語氣講嘅，同時家長靜止咗，可能佢冇諗過我會咁講，之後好惡咁走咗，亦當然佢冇再嚟啦

我以為事件完結，但點知有一日，同佢喺同一間餐廳食嘢，仲要坐正我隔離枱。我即時心知不妙，不過本著「我唔尷尬，尷尬喺人哋」嘅心態，決定扮唔識，照叫嘢食

殊不知，有趣了

家長突然叫了侍應過來

家長：「我想問，我叫A餐，人哋又叫A餐，點解唔同價㗎？」

家長係望住我講

侍應：「你講咩，唔明」

家長：「一樣叫A餐，點解唔同價錢呀！」

侍應望一望我個餐：「人哋下午茶，你午餐，咪唔同價囉」

嗰下我同同事笑咗出來，都真係唔好意思🤣

我同侍應說：「冇嘢冇嘢，唔關你哋事，佢針對我啫」

侍應聽完，望一望個家長，轉身走咗

當然全餐飯，個家長不停念經咁啦

我食完便走，唔想同佢嘈

往後家長每次行過我門口都會大大聲講：「黑店！」

呢個情況都維持了兩年左右，直到開始有疫情，先不見佢出現

讀者投稿@XYZ