#ParentLicenses1732

新買嘅居屋仔裝修完畢，之前因疫情限聚令加埋裝修公司拖住都拖咗成兩個月先交樓，最近就諗住接埋家人一齊去住

我父母覺得之前因裝修啲噪音會嘈到人，會令鄰居唔高興，所以我哋準備咗啲超市禮卷派俾啲鄰居，同佢哋講聲唔好意思。禮卷嘅金額雖然唔多，只係$100，但係都叫做少少心意，我哋都對得住自己，我諗無咩鄰居新居入伙裝修會派禮物，最多寫張紙喺走廊通知裝修期限

隔咗幾日，喺我準備出門返工嘅早晨，我對面個鄰居帶咗個兩三歲嘅BB撳我哋門鐘

鄰居：「可唔可以幫我睇住個仔？我要帶個大女返學」

我即刻拒絕

一、我趕住返工

二、我父母年紀都唔細，佢哋加埋成百歲，咁耐未照顧過小朋友，突要佢哋照顧個三唔識七嘅小朋友我都唔放心

三、萬一小朋友喺我哋屋企發生咩事邊個負責？責任實在太大，而且又唔係熟人，所以我三思完都係即刻拒絕

我：「唔得呀，我要返工，唔好意思呀」

鄰居：「裝修咁嘈我都頂咗成個月啦，你俾張超市禮卷就算數？幫手湊下仔就咁多嘢講，你返工啫，你父母都無嘢做！」

大家都唔係細啦，幫陌生人湊仔咁大責任嘅嘢你會唔會做先？大佬！我唔係托兒所，而且你可以搵你屋企人湊，搵個陌生鄰居湊係咪有咩事你自己負責返先？一陣你仔嘔奶、痾濕尿屎，我哋又冇片俾佢換真係盞搞

再諗深一層，我懷疑緊佢係咪有咩問題，點解唔搵其他鄰居湊？要搵一家啱啱搬嚟嘅新鄰居？其他鄰居住咁耐，唔係應該更值得信任？

最後我係無理佢，由佢喺走廊嘈，我照閂門撳𨋢返工，唔知佢最後點處理

其實你大女要返學，得細仔喺度依件事，你一定唔係啱啱先知啦！前晚你應該準備定，而唔係即時求其搵人湊，仲要人哋一定就要幫你？始終防人之心不可無，我又驚你BB喺我哋屋企有咩事就訴諸我哋，最重要係大家都唔識！

讀者投稿@樓奴