#ParentLicenses1731
話說，今日我喺一間日式超市度買緊嘢，適逢係假期加上母親節，度度都爆滿人
到去收銀排隊俾錢時，見到條龍超長，咁啱有個要手抱嘅小朋友同家長排我前面，個小朋友同我say hello，我禮貌回應咗hello；跟住隔咗5分鐘後，佢又同我say hello，我又再禮貌講多次hello
條隊真係超長，等咗10分鐘都未行到去收銀個位，個小朋友又再同我say hello，我唯有低頭玩手機扮睇唔到，因為真係有啲煩
個小朋友見我唔理佢，佢又係咁講：「hello, hello, hello」
我真係頂佢唔順，所以又再一次同佢講：「HELLO，小朋友！」
不過今次我大聲好多，等佢家長同周圍嘅人都聽到我回應咗佢，希望佢唔使再同我打招呼。雖然禮多人不怪，但不斷重覆講令人覺得真係好煩，所以我講完今次就專心玩手機唔再理佢
點知又隔多5分鐘後，佢又再say hello，我唯有帶埋耳機扮聽唔到。小朋友就係咁hello, hello, hello……hello咗30分鐘，但佢父母係完全無阻止或勸喻
排咗30分鐘，終於排到我，心諗埋完單應該唔會再見啦，點知我去停車場攞車時又見到佢哋，個啲hello聲仲喺我耳邊係咁傳。我一枝箭跑去車位攞車，佢小朋友就改由hello變bye-bye
我好快咁將啲嘢擺喺後尾箱，佢爸爸就話：「小朋友講hello又唔應，講bye-bye都唔應，使唔使咁無禮貌呀！？」
我當場眼都突埋，心諗應咗你個仔幾多次呀，你個仔成部複讀機咁係咁重覆，唔係個個都要覺得咁樣係可愛㗎，知唔知係好煩㗎啫。不過我只係心諗佢真係好煩而已，都冇出口話過佢哋半句
然而，小朋友嘅爸爸真係超小學雞，佢喺停車場出嚟後，突登逆線兜返個圈出嚟，再喺我面前急停。我車速慢啫，但咁嘅行為真係好危險同好低EQ。我只係唔應你仔一次啫，你有冇諗過我喺之前應咗你個仔好多次呀！？
車住個仔都仲做啲咁嘅嘢，係咪想害死自己個仔！？如果你係呢位爸爸，唔該你唔好再咁低B同自我中心，安全第一呀！
讀者投稿@知唔知好危險
