#ParentLicenses1683

我家姐係一個離咗婚，而且有個3歲仔嘅中女；前姐夫係一個從網上認識嘅澳門人，我見過唔夠10次

由拍拖到結婚只係一年內發生嘅事，而佢哋結婚係因為大咗肚。呢件事我已經覺得好反眼，根本係散拖加個意外

所謂嘅前姐夫就喺結完婚就返咗澳門，但又無接家姐同個仔過去，好快前姐夫就識咗第二件之後就同家姐離婚了！

家姐無因為咁而放棄愛情，反而仲更積極搵男朋友，個仔就我呀媽照顧啦

家姐本身係一個空姐，上年失咗業伊始，之後就無再做嘢，選擇去做所謂嘅KOL。家姐個樣唔係靚，但化妝有一手，可能之前做空姐學返嚟，加上所謂嘅KOL，於是都好易識到男仔……留意，係「男仔」

呢一年，我已經見佢拍第三個，三個都細過佢。我屋企好細，係舊樓，所以家姐唔會帶啲男仔返屋企，所以最新呢個男朋友都應該唔知家姐有個仔

佢最新嘅呢個男朋友係自己住，所以家姐識人唔夠兩個月就搬撚咗去人哋度住。呢個新年，佢男朋友話想見下我呀媽同佢拜個年，家姐就打返嚟話男朋友想上嚟，但叫我哋帶走個仔，唔好俾男朋友見到。呀媽無理佢收咗線

到年初一，我哋聽到開門聲，家姐一打開門，大家就見到晒大家，家姐即時西面。男朋友打完招呼坐低，喺佢想問之際，家姐就嚟一場大龍鳳，一哭二鬧三上吊，講到自己俾人搞大個肚，唔想殺死一條生命，又乜乜物物……佢男朋友當時就安慰佢

其實邊係家姐講嘅，好多都係老作

事後佢哋離開咗屋企，家姐當晚就message我哋話想將呀仔送去保良局，因為佢會再拍拖同會再婚，所以呀仔只會阻住佢

我呀媽已經係放棄狀態，無打算再理家姐同想去房署除佢名，但呀媽會繼續照顧家姐個仔

我想請問咁多位，有無手續可以幫呀仔同家姐脫離關係？謝謝大家

讀者投稿@求助細妹