#ParentLicenses1659

有件事真係不吐不快，想搵人傾，但可惜冇人明白我諗乜

我係做小學補習老師，上門私補嗰種。教咗幾年，大部分小朋友都好乖，個別有啲最多都係想偷懶唔做練習或者特登拖慢嚟做。咁我都好明白，返咗半日學都會攰，仲要補習、溫書、做練習，好多時唔係好過分嘅我都放過佢，因為喺考試之前，佢哋大都會醒水，自動自覺做嘢、溫書

話說每年都會有批小六生走，所以每年都有繼續接新學生，就喺2021年暑假嗰陣，我接咗個升小五嘅學生

未上堂之前，我同學生媽媽傾過幾句，了解下小朋友弱項喺邊。到九月開始正式上堂，開頭都好地地，但後期個學生愈嚟愈懶，例如俾咗啲功課又唔做，講緊只係1-2頁，成份功課都唔超過20題

可笑又可悲嘅地方嚟喇

學生慵懶嘅態度連媽媽都默許咁做，一開頭都會話兩句，到後期直頭唔理、唔出聲。我喺佢測驗考試前加堂，已經冇俾功課，只係叫佢上堂做，但仍然只做幾題就走開，唔係同個妹打交，就係食嘢，再唔係就撚狗（佢哋屋企有隻狗）

阿媽媽一係坐喺隔離睇住佢哋打交，一係大大聲煲電話粥，再唔係就係約好晒上堂時間，到上堂前三、四個鐘就話：「都係唔補啦，個女好攰呀要休息一下，考試前嗰日先上啦」

阿媽媽，你明知你個女成績唔好，叫佢做功課時，你又同個女講：「唔想做就唔好做啦，等補習老師教」

到考完返嚟唔合格，就同我講：「又唔合格喇，你鞭策下我個女」

真係聽到我心裏面無限反白眼加粗口🤬🙄️！

上堂時間仲要係我主動約，呢位媽媽從來冇主動過，有時甚至唔記得約咗時間上堂，見到我仲反問：「乜今日要上堂咩？」

唔係錢嘅問題，係心態問題，冇心讀嘅不如唔好補啦，浪費大家時間，更重要嘅係浪費晒我啲心機

我唔敢話自己好出色、好有成就，但係我教過嘅學生冇全科90幾都一定有80幾，走咗嗰批小六個個都係頭三志願

然而，只有呢位媽媽夠膽同我講話：「入band3就band3啦，唔學壞就得」

咁呀，你仲使咩補習？

圖片來源@功夫
讀者投稿@冇心學唔好晒大家時間