#ParentLicenses1650

班入面有一位好麻煩的學生家長，由政府於上星期宣布幼稚園及小學要透過Zoom上課之後，就日日WhatsApp我

家長：「做咩學校唔即時停課，要等到星期五？」

我都同佢解釋返：「要派簿同要教學生點用Zoom」

家長：「我自己喺屋企教咪得囉！疫情咁嚴重仲要小朋友返學，唔驚感染呀？」

我只係同佢講：「有唔滿意就直接向學校投訴！」

最後冇再理佢

直到上星期五，開始實施用Zoom上課，不過同時都有部份學生返咗學校，原因係教育局規定學校要保持開放，讓唔方便喺屋企上Zoom嘅小朋友返學校上

最意想不到係，竟然俾我見到嗰個麻煩家長嘅小朋友都返咗嚟學校！

我善意咁問小朋友點解返，佢話阿媽叫佢返（到今日佢都係返學校上zoom）

到放學時間，我帶小朋友落去操場，見到佢家長，個家長就捉住我問話

家長：「做咩咁多人喺度接學生？唔驚傳染呀？做咩我個仔要同其他同學一齊上Zoom？有病點算？」

我：「係學校安排」

我只回咗佢一句就走咗

其實嗰刻我真係想爆粗！日日嘈點解學校唔停課，但到停課你又帶小朋友返學校Zoom，又話返學好危險？又話自己識教個仔？

呢樣都算！返到學校比晒空間，晒device你個仔上堂，你仲嫌學校防疫措施差？咁驚你咪留個仔喺屋企囉！

我理解大部份學生係雙職家庭，停課期間，小朋友喺屋企冇人照顧，所以要返學校上堂，但唔代表可以講一套做一套！你嘈得要停課，即係代表你有能力照顧小朋友在家網課，然而你一邊嘈，一邊又帶小朋友返學，根本講唔過去！

圖片來源@出埃及記
讀者投稿@小學教師