#ParentLicenses1623

各位家長、讀者及板主，你哋好

今日係平安夜，我同各位怪獸家長一樣，都同小朋友扮晒靚、去行下街、玩下，當然唔少得要沿路護航擔任埋保鑣、保母

我哋去咗屯門最大嘅商場玩，廣場中間有以迪士尼主題搭建嘅設施。理所當然大家都沖去排隊影影影，而且一路都玩得開心，完全無事發生，我仲心諗：「屯門牛嘅質素提升咗喎」

利申：我都係屯門牛一隻，仲要係肥牛

點知一轉場過隔離商場玩入錢巴士，就俾我見識到「世界觀觀世界」嘅「禽獸家長」……你無睇錯，我無打錯——係禽獸家長，仲要長老級禽獸家長

事源我哋入咗錢玩緊架巴士，但架巴士又係衰，佢唔會好似90年代啲入錢車車咁頭搖又尾擺，於是人哋呀嫲就以為我哋無入錢，係咁係側邊講：「要入錢㗎，唔入錢唔好霸住啦，俾人哋玩啦」

我仔4歲，另加表妹4歲同表弟2歲就呆咗望住我，我就同小朋友講：「繼續玩，無事發生」

到玩完一轉後，我認我勁無品地無叫小朋友落車，直接再喺佢哋面前入多次錢玩多轉。入完錢後，我再望下佢哋，結果佢哋面懵懵咁望天望地

你哋以為我單純因為咁而叫佢哋做禽獸家長？年輕人，你太年輕啦！

歡樂時光過得快，到時間講bye bye，我就叫啲小朋友一個一個落嚟。當有公主病嘅表妹最後一個落黎嗰陣，禽孫們（目測至少6歲以上）一個戰步沖上車，將公主病嘅表妹直接撞飛，由車門撞埋車廂內，撞到佢面容扭曲，頭上嘅皇冠半甩，條裙飛起咗，狀似俾人施暴完咁……

作為舅母嘅我心都赤埋，我即時怒睥住對禽孫，佢哋仲掛住爭個車頭位，而對禽爺禽嫲仲好笑，見我望住即時作勢講：「唉呀～你兩個真係呀，唔好爭啦，撞到人啦！人哋落得慢，你哋要等㗎！唔好咁啦……」

係呢刻，我可以確認佢哋無諗過道歉，亦無諗住教小朋友道歉

於是我唯有同公主病嘅表妹講：「我哋走，你俾狗咬，唔使咬返隻狗，呢類人由佢，終有日社會會有人幫佢哋教」

讀者投稿@mrs o