#ParentLicenses1607

今日的經歷令我很無奈，所以我很想透過文字分享，發泄一下。這是我第一次投稿，寫得比較長，故事是關於小孩和狗

我有一個歲半大的男寶寶，亦養咗兩隻狗，一隻係柯基，一隻係tea cup貴婦

我差唔多每個月都會去一次沙田新城市廣場一期一樓嘅狗公園玩，因為貪佢配套設施夠齊全，而且喺入面唔會好多大狗，通常都係中型犬或者係細狗，另外園區範圍唔算太大，對我來講比較容易控制

幾個月之前，商場仲喺一期三樓開多咗一個狗區，外面仲有限定咖啡店以及露營設施可以俾大家打卡、影相。我之前都去過兩次，依家仲吸引咗越來越多小朋友入去玩

今日又出發一家五口去玩。因為二期嗰邊停車場先有𨋢可以直上，一期停車場要經電梯或樓梯先可以搭𨋢，所以每次都要由二期推狗車去一期

我哋每次搭𨋢都會盡量避開啲人，又或者問咗𨋢內人介唔介意先，因為明白到唔係每個人都鐘意狗

當時我哋終於等到𨋢，見到裏頭有人，所以就費事入去，但係入邊嘅人都好好話：「唔緊要，我小朋友都想睇下狗」，所以放低芥蒂就入咗𨋢

企喺我後面再後面嘅一家大細，其中一個男人就勁大聲咁話：「有冇搞錯啊？拖住隻狗周圍走，喺商場整到啲細路點算？」

第一，我隻狗係坐住架寵物車，並唔係拖住
第二，沙田新城市廣場係俾寵物入內，只要坐住車或者係放入袋就得，甚至佢哋仲有得租寵物車俾狗坐
第三，佢哋商場入面係有兩個寵物公園，有狗好正常
第四，其實狗好善良，唔會無啦啦去隨便搞啲小朋友，除非你好突然伸手去摸佢哋個頭，佢哋有機會縮一縮，或者觸發佢哋神經，如果唔係唔會隨便攻擊人

縱使心中有好多反駁，嗰刻已經好無奈，但考慮到𨋢程短短，最後無理到個男人

到達咗目的地後，發現人多過狗，而且有唔少小朋友。當我哋入到去玩嘅時候，有一對目測7, 8歲嘅男孩，我簡稱係「孖寶」，孖寶不斷喺個場跑來跑去，又不斷開門，仲要開晒兩道門（如果有去過狗公園嘅朋友都會知道會有兩道門，作用係防止啲狗走失）

當時已經有狗主溫馨提示佢哋：「唔好開晒兩道門，因為啲狗會走失」

直至到第三次，孖寶又同一時間開晒兩道門，導致有柴犬差啲衝咗出去，跟住柴犬狗主好惡好大聲鬧哋：「小朋友講咗好多次啦，唔好開晒兩道門啦！我隻狗走失咗，唔通你哋幫我追返隻狗？」

孖寶理都冇理個男人，又喺第二道門走咗，嗰刻我就喺度諗，男人大聲鬧到全場靜晒，究竟啲家長去咗邊？唔通去咗買餸？

因為狗公園真係多咗好多小朋友，我都要時刻警惕。有啲小朋友都好乖，佢哋嘅父母都好好，會同佢哋講：「要問咗哥哥姐姐，先可以摸人哋隻狗㗎」

問完之後，家長仲會陪小朋友一齊去摸隻狗，教佢哋要輕輕摸，同埋唔好太大聲叫，因會嚇親狗狗，真係要俾個「讚」呢啲好守秩序、有禮貌嘅小朋友同家長

除咗孖寶，仲有一個小女孩，我簡稱佢為「大聲公」，目測6, 7歲。大聲公一入來就係咁嗌、係咁跑、係咁叫，同行有佢爸爸同3, 4歲嘅細佬

大聲公係咁嘩嘩聲咁叫，然後又係咁同佢老竇講 : 「我要行過去摸啲狗，我好想摸佢哋！」

大聲公就即刻衝埋去啲狗度，想伸手嘅時候，無啦啦又大嗌，話都係好驚，然後周圍跳。後來被選中想摸嘅狗就係我隻得隻手咁大嘅tea cup，好多小朋友都好鍾意佢，因為夠細隻可愛。但係我想講，你嘅舉動真係會嚇親我兩隻狗，然而身邊嘅老竇完全無動於衷，其實係咪應該叫你個女冷靜下先，同埋唔應該橫沖直撞周圍跑？佢咁樣周圍跳，仲要踩到我隻狗隻手，搞到我隻狗叫咗下，我隻狗隻手好幼，講真踩斷都真係唔出奇

嗰一刻我真係好無奈，我只能夠講句：「小朋友你小心啲踩到我隻狗」

大聲公仲走去笑住同佢老竇講：「頭先隻狗叫咗下，我好興奮又好驚」

嗰刻我真係好無奈

然後就到佢細佬，沖埋嚟想摸我隻柯基，我攔住咗，我話：「我隻柯基唔係好鍾意同陌生人玩」

大聲公又走去同佢老竇投訴我唔俾隻狗同佢哋玩，但係又俾佢同BB玩。佢同佢老竇用啲好乞人嘅眼神咁望住我，示意好似我做錯咁

大佬呀，我自己個仔同我兩隻狗玩好正常，由細一齊玩到大，而且我冇義務一定要俾我兩隻狗同你小朋友玩，再加上你又踩到我狗隻手，我隻柯基又真係唔鍾意陌生人，到時吠你個小朋友就唔好啦

正當我又再有一刻無奈嘅時候，我都係選擇唔出聲，係因為人哋老竇都覺得自己個女行為冇問題，踩到人哋隻狗唔使道歉，唔通要我教人教小朋友咩，所以最尾先投稿發泄下

說時遲那時快，孖寶又返嚟，佢哋又開咗兩度門，當時我見到我兩隻狗喺道門附近，我即刻大嗌 : 「唔好再開兩道門，狗會衝出去」

點知孖寶完全冇理我，都係無閂返兩道門，結果兩隻狗衝走咗，好彩外面有人幫我捉住返我隻細tea cup，我一手又拉返住我隻柯基，好彩佢哋都細膽，唔敢走太遠，如果唔係都唔知點追，我真心想講粗口！

其中一個男狗主終於忍唔住話要搵小朋友嘅家長，佢話一定要搵佢家長出嚟同佢哋講，最尾又真係俾佢搵到，原來佢哋家長就坐咗喺距離狗公園唔太遠嘅側邊

點解個細路總共俾人鬧咗四次，當中柴犬個狗主仲係好惡好大聲咁令到全場靜晒，作為家長嘅你都睇唔到？掛住同側邊個師奶傾偈傾得咁入神？

我見到男狗主好詳細咁將個內容講俾佢家長聽，結果換來嘅就係家長淡淡然講一句：「你唔好成日再走來走去啦，搞到我俾人話啦」

搞到好似係我哋班狗主，專登話佢個細路咁，其實你究竟明唔明走狗係幾大件事？你知唔知呢度係寫住Pet Park，公園喺隔離唔喺呢度？你要喺寵物公園玩，就要遵守返寵物公園嘅規則，一定要關實門，唔可以兩道門一齊開

最後想講，沙田新城市廣場整得呢啲設施，就預咗讓小朋友同狗同場玩，因為好多家長都想小朋友接觸小動物，但係又未必想養

我都希望家長會陪住小朋友一齊去玩，講真有好多小朋友係好熱情，一見到狗就衝埋去，又嗌又即刻伸手摸佢個頭，其實有啲狗可能需要一啲時間去適應，又有啲狗係唔鍾意陌生人，所以真係要問咗主人先可以摸。如果唔係，到其時隻狗吠或者狗本能反應縮開，而小朋友都繼續去伸手摸，就有機會構成意外，到時又怪狗主，真係好無奈

P.S. : 狗是好善良的，我仲好記得我個仔剛學行的時候，佢哋一定會企喺我個仔仔側邊，好似要保護佢咁；當仔仔跌低咗，佢就會即刻上前舔佢、安慰佢，所以我相信狗同小朋友是可以一齊相處及一齊成長，希望路人及家長多點了解及包容，少點評批及指控

讀者投稿@狗媽寶