#ParentLicenses1601

上星期帶小朋友去調景嶺遊戲室玩，當時節數未夠鐘，同場仲有大約５個家庭坐喺出面等入場

有個小妹妹走埋嚟
妹妹問我仔：「你叫咩名呀？」
我答佢：「佢叫XX呀」
妹妹：「點解佢唔講嘢呀？！」
我：「佢1歲幾，仲未識答你啊！」

佢婆婆走埋嚟，拎個手機對住我仔：「妹豬，你真係好叻呀！識講咁多嘢！婆婆真係教得你好好呀！你繼續問啦，同BB講嘢，我幫你send畀媽咪睇下你幾叻叻！」

佢邊講邊將個手機zoom到勁近我同我個仔

我：「唔好意思，唔該唔好影我小朋友」
婆婆：「唓，影下啫，小朋友多啲互動先識講嘢溝通㗎嘛，你唔俾佢同人講嘢，緊係唔識講啦！」
我：「你邊隻眼見到我唔俾佢同人講嘢呀！？問題係你影住我個仔，有無問過我可唔可以呀？有無禮貌呀？你小朋友好叻呀！關我咩事？你要影咪影返佢！」

阿婆一直口噏噏鬧我，又一直去叫個孫女搵其他小朋友傾偈，再追住佢影

可能有人覺得我懶矜貴，但我想講，影人哋小朋友之前問聲，係基本尊重

讀者投稿@Cheung